БНАСАУ-ын цэргүүд манай улсын цэргүүдтэй гар зөрүүлсөн тухай мэдээлэл сүүлийн үед хүчтэй тараад байна. Чухам ямар учраас нэгэндээ гар хүрэх дээрээ тулсан, энэ байдлаас болж хэр хэмжээний хохирол зөрчлүүд бий болоод байгаа нь тодорхойгүй ч багагүй хэл ам, шуугиантайгаар яригдсаар байгаа юм.

Эх орондоо байгаа  манай цэргүүд, хүний нутагт яваа Хойд Солонгосын цэргүүд ийн энэхүү маргаан зөрчлийн талаар олон нийтэд зөв ойлголтыг нь өгч үнэн зөв мэдээлэл тараах ёстой байгууллагууд ч таг дуугүй суусаар байна.  Ер нь Зэвсэгт хүчин, Батлан хамгаалах зэрэг газрууд өөрсдөд нь хамааралтай ямарваа нэг зөрчил, асуудал гарахад ямар ч тайлбар өгдөггүй, аль болох дараад өнгөрдөг нь “гэм биш зан”. Гэтэл иргэд тэдгээр газруудтай холбоотой зарим асуудлын талаар эдгээр албан газруудаас тодорхой мэдээлэл түгээхийг хүлээсээр байдаг билээ.

Дээрх хэрэг  Зэвсэгт хүчний 016 дугаар батальонд алба хааж буй хугацаат цэргүүдийн дунд болсон гэнэ. Тодруулбал,  манай улсын хугацаат цэргийн албын дөрвөн алба хаагч манай улсад ажиллаж буй гадаадын иргэдэд зодуулсан аж. Үүнийг ЗХЖШ- ынхан ихэд нууцалж, тусгай хүн томилон цэргүүдийн ар гэрййнхэн болон барилгын гэрээт харуул хамгаалалтын алба, гадаадын иргэдийн амыг таглах арга хэмжээ авсан сурагтайг хэвлэлийнхэн ч онцолж байна.

Харин бусад эх сурвалжийн мэдээлж буйгаар Хан-Уул дүүргийн Засаг даргын Тамгын газрын дэргэд барьж буй хувийн компанийн орон сууцны барилгад 016 дугаар ангийн хугацаат цэргийн алба хаагчдаас нэлээд хэдэн залууг ажиллуулж байсан гэнэ. Гэтэл тэр хавьд нь Хойд Солонгосын иргэд ажиллаж байгаад,  орой ажил тарах алдад манай цэргүүд, Хойд Солонгосын ажилчид хоорондоо муудалцаж зодолджээ.  Тухайн зодооныг харсан гэрчүүдийн мэдэгдэж буйгаар “Хойд Солонгосын ажилчид манай залуусыг төмөр, мод, чулуугаар цохисноос цэргийн 3-4 алба хаагч гэмтсэн” гэнэ. Гэмтсэн цэргийн алба хаагчдыг ГССҮТ болон Батлан хамгаалах, хууль сахиулах алба хаагчдын нэгдсэн эмнэлэгт хүргээгүй бөгөөд харин хувийн эмнэлгүүдээр эмчлүүлж байгаа аж.

Монголчууд Хойд Солонгостой хамгийн их  элэгтэй байдаг гэж хэлж болно. Манай хоёр орны харилцаа бусад улсуудтай харьцуулахад сайн байдаг талаар албаныхан ч хэлдэг. Хоёулангийнхаа Консулын газрыг байрлуулдаг цөөхөн улсын нэг. Гэтэл Хойд Солонгосын цэргүүд Монголын нутаг дэвсгэр дээр, Монгол төрийн зэвсэгт хүчний албан хаагчдыг зодно гэдэг байж боломгүй зүйл. Тиймээс энэ талаар албаныхан нууж, хаацайлаад байлгүй олон түмэнд бодит байдлыг илчилж,  зодсон ажилтнуудад арга хэмжээ авахуулж,  нутаг буцаах ёстой иргэд шаардаж байна.

Харин зарим эх сурвалжийн хэлж буйгаар албаныхан тэдэнд арга хэмжээ авч, нутаг буцаахаар болсон гэв.