Өнөөдөр Элсэлтийн Ерөнхий шалгалт орон даяар зэрэг эхэлж байна. Өнөөдөр сурагчид Монгол хэлний хичээлийн шалгалтаа өгнө. Энэ жил улсын хэмжээнд нийт 32 493 хүүхэд арван нэгдүгээр ангиа төгсч байна. Мөн өнгөрсөн жилүүдэд сургууль төгссөн 5839 хүн, нийтдээ 38332 шалгуулагч ЭЕШ-т оролцохоор бүртгүүлээд байгаа ажээ.
Одоогоор ЭЕШ-д бүртгүүлсэн хүүхдүүд бүртгэлээ баталгаажуулан суудлын хуваарь буюу шар хуудсаа авч дуусгажээ. Боловсрол, шинжлэх ухааны яамнаас Элсэлтийн ерөнхий шалгалтын хуваарийг батлан гаргаад байгаа бөгөөд их, дээд сургуульд элсэгчид зургадугаар сарын 14-19-ний хооронд шалгалтаа өгч дуусна. Ингээд шалгалтын хуваарийг танилцуулж байна.
Харин шалгалт өгөхдөө юуг анхаарах ёстой талаар мэргэжлийн хүмүүс доорх зөвлөгөөг өглөө.
- Шалгалтанд орохдоо хувийн бэлтгэлээ сайн хангасан байх шаардпагатай. Тухайлбал үзэг, бал, баллуур, бүр мөнгө хүртэл бэлэн байлгах хэрэгтэй бөгөөд өглөө явахдаа эрж хайхааргүй газар тавиарай.
- Сэтгэл санааг тань үймүүлэхээр кино, уулзалт, яриа зэргээс хөндий байгаарай. Инээдмийн кино үзэж болох юм.
- Эмчийн хэрэглэхийг зөвшөөрсөн, эсвэл зайлшгүй уух шаардлагатай эмнүүдээс өөр бусад тайвшруулагч, өвчин намдаагч зэргээс татгалз.
- Дотор эрхтний тань үйл ажиллагааг эвдэх, эсвэл хүнд хоол унднаас зайлсхий. Хөнгөн төрлийн хүнс хэрэглээрэй.
- Бүх цагаа өглөө дуугарахаар тааруулж, гэрийнхэндээ ч захиарай.
- Унтдаг цагтаа л унтах хэрэгтэй. Шөнө нойргүй хонож болохгүй.
- Шалгалтын өглөө төлөвлөсөн цагтаа сэрээд өглөөний цайгаа яасан ч мартаж болохгүй. Хөнгөн төрлийн зүйлс идэхээ мартуузай. Шарсан барьсан зүйл эсвэл бусдыг эвгүй байдалд оруулахгүйн тулд саримас зэрэг зүйлсээс зайлсхий.
- Ус, чихэр, шоколад, жүүс, жигнэмэг зэргийг авч болно.
- Шалгалтанд орох хуудас зэрэг бичгүүдээ дахин нэг хяна.
- Шалгалт өгөхдөө чөлөөтэй байх хувцас сонгож өмсөх хэрэгтэй.
- Шалгалт эхлэхээс ядаж хагас цагийн өмнө сургууль дээрээ оччихсон байхаар гэрээсээ гараарай.
- Гэрээсээ гарахдаа өөдрөг сэтгэлтэй гараарай.
- Гэр бүлийн гишүүдээс тань цуг очихыг хүсвэл бүү татгалзаарай.
- Шалгалтын үр дүнгийн талаар бодолгүйгээр шалгалтандаа ороорой.
Хүүхдүүд ЭЕШ өгнө гэхээр айж тэвдэх, эсвэл шалгалтын өмнөх орой ядартлаа хичээл хийснээс шалгалтаас хоцрох, шалгалтан дээр нойрмоглох байдал түгээмэл ажиглагддаг. Тиймээс айж тэвдэлгүйгээр хувийн бэлтгэлээ базаагаарай. Шалгалт өгөх үедээ цагаа зөв хуваарилан шаблоноо бөглөхгүй бол цагтаа багтааж амжихгүй байх нь бий. Өнөөдөр бүх шалгуулагчаас монгол хэлбичгийн шалгалт авна. Улмаар шалгалт өгөөд гарч буй шалгуулагчид бүртгэлийнхээ хуудсан дээр наалт наалгах болно. Уг наалтыг наалгуулсан тохиолдолд дараа дараагийн шалгалтад орох эрхээ авах юм байна. Тиймээс бүртгэлийн хуудсанд хянагч багш нараар ялтас наалгахаа мартаж болохгүй гэдгийг анхааруулъя.
Т.Энхэлээ
