Бразилийн гялалзаж буй од, Рональдо, Рональдиног залгамжлах дараагийн хөлбөмбөгч хэмээн яригдаж байгаа Неймарын тухай 24 баримтыг хүргэж байна.

1.    Өдгөө 22 настай түүний бүтэн нэрийг Неймар да Силва Сантос Жуниор гэдэг.

2.    Неймар хөлбөмбөгчний гэр бүлд төрсөн. Түүний аав орон нутгийн нэгэн клубт Неймар Да Сильва нэрээр тоглодог байжээ.

3.    Түүний авьяасыг эцэг Неймар олж нээсэн гэдэг. Тэрээр “Гурван настай байхдаа бөмбөг хөөгөөд явж байсныг нь санадаг. Жаахан мэдээ ороод дөрөв, таван насандаа бусад хүүхдүүдээс нэг л өөр байсан. Тиймээс би хөлбөмбөгийн клубт өгч замналыг нь эхлүүлэхээр шийдсэн. Би түүнийг заавал хөлбөмбөгчин бол гэж ятгаагүй шүү дээ. Өөрөө үүндээ их дуртай байсан” хэмээн дурсчээ.

4.    Түүний анхны баг Бразилийн сонирхогчийн лигт тоглодог  Португеса Сантиста юм. Энэ багт хөлбөмбөгийн цагаан толгойг заалгаж эхлэхдээ Неймар ердөө найман настай байв.

5.    Неймар 2003 оноос Бразилийн тэргүүн лигт тоглодог “Сантос” клубын идэрчүүдийн багт элссэн юм.

6.    Тэрээр идэрчүүдийн багт байхдаа буюу 15 насандаа гэр бүлээ аваад явчих хэмжээний мөнгөн орлого олж эхэлсэн.

7.    Неймар  2009 онд буюу 18 насандаа Сантостай мэргэжлийн гэрээ байгуулсан. Түүнийг мэргэжлийн гэрээ байгуулахад Пеле, Роберто Карлос, Кафу, Пепе нар өөрийн биеэр очиж баяр хүргэж байв.

8.    Сантостай гэрээ байгуулахаас урьд Реал Мадрид тэднээс өрсөх гэж байсан гэдэг. Реалын спортын мэргэжилтнүүд түүний гэрт очин ятгаж, гэрээнд гарын үсэг зуруулах гэж хичээж байв. Гэвч Сантосчууд санал болгосон үнэ дээрээ 10 саяыг нэм гэсэн санал тавьснаар Реал арга буюу нутаг буцжээ.

9.    Неймар анхныхаа улиралд 48 тоглолтод оролцон 14 гоол оруулсан юм.

10.    Хөлбөмбөг сонирхогчид түүний тааварлахын аргагүй тоглолт, бөмбөгний төлөөх тэмцэл, бөмбөг эзэмших чадварыг биширдэг.

11.    2010 оны улиралд тэрээр 60 тоглолтод 42 гоол оруулсан. Энэ улиралд тэрээр Өмнөд Америкийн шилдэг хөлбөмбөгчний шагналд нэр дэвшин гуравдугаар байранд орсон билээ. Дөнгөж 19 настай тамирчны хувьд энэ бол гайхалтай амжилт байсан нь тодорхой.

12.    Реал Мадрид, Манчестер Юнайтед, Челси, Ювентус зэрэг дэлхийд алдартай багууд түүнд санал тавьж байжээ.

13.    Түүнийг алдарт Месситэй харьцуулдаг. Харин тэрээр Мессигийн тухайд "Месси бол миний тоглолтыг нь үзэж байсан хамгийн шилдэг хөлбөмбөгч. Би түүнтэй ойролцоо тоглодог нэг ч хүнийг олж хараагүй. Би Мессиг үхэн үхтлээ хамгаалах болно. Лио бол "Барселона"-гийн асуудал биш. Тэр бол бидний асуудлыг шийдвэрлэдэг гол хүн билээ" гэжээ.

14.    Нэр алдарт хүрэхийн хэрээр түүнийг оддын өвчин тойрч гарсангүй. Найз охиноо зодсон хэрэгт буруутгагдаад байсан ч тэр нь нотлогдоогүй.

15.    Тэрээр одоо Бразилийн савангийн дуурийн од Бруна Маркезинтай үерхэж байгаа.

16.    Олон нийт түүнийг Рональду шиг болж байна гэж шүүмжилдэг ч өөрөө үүнийг хүлээн зөвшөөрдөггүй. Неймар  энэ талаар “Миний насны залуус амжилтанд хүрэхээрээ яадгыг би мэдэхгүй. Гэхдээ надад их зан гаргаж, зунгаацаж цэнгэх зав байхгүй. Би дараагийн амжилтандаа хүрэхийн тулд хичээж байгаа. Хэрвээ би бүх мөрөөдлөө биелүүлчихвэл зугаацаж болно шүү дээ” гэжээ.

17.    Бразилийн хэвлэлийнхэн түүнийг хөлбөмбөгийн Жастин Бибер хэмээн нэрлэх дуртай.

18.    Неймар “Сантос”-ын идэрчүүдийн багт зургаан жил, мэргэжлийн багт есөн жилийг үдсэн.

19.    Тэрээр Бразилийн лигийн шилдэг тоглогч 2011 он, Өмнөд Америкийн шилдэг хөлбөмбөгч 2011 , 2012  зэрэг шилдэг гэсэн тодотголтой зургаан шагнал хүртэж байжээ.
20.    Өнгөрсөн онд 50 сая ам.доллараар Каталоны багт хүч нэмсэн.

21.    Неймар 2010 оноос  Бразилын шигшээ багт дуудагдсан. Тэрээр шигшээ багийнхаа төлөө 20 гаруй гоол оруулаад байна.

22.    Хэдхэн хоногийн өмнө Неймар ДАШТ-ий анхны тоглолтондоо оролцсон бөгөөд  энэ тоглолтонд дубль хийж, мэргэн буучдын жагсаалтыг тэргүүлж эхэлсэн юм.

23.    Тэрээр энэ ДАШТ-д 10 дугаартай тоглож байгаа.

24.    Тэр ердөө 22-хон настай ч бүхэл бүтэн улсынхаа өмнө, бас дэлхийн өнцөг булан бүрт суугаа хөгжөөн дэмжигчдийнхээ өмнө дэлхийн аваргын цомыг авчрах хүндхэн үүрэг даалгаврыг хүлээгээд буй.