Хурдан морь унаач хүүхдийн хөдөлмөр нь хүүхдийн хөдөлмөрийн тэвчишгүй хэлбэрийн нэг бөгөөд Засгийн газрын 2011 оны 303 дугаар тогтоолын хавсралтаар батлагдсан Хүүхдийн хөдөлмөрийн тэвчишгүй хэлбэрийг устгах үндэсний хөтөлбөрт хурдан морь унаач хүүхдийн хөдөлмөр хамгаалал, аюулгүй байдлыг хангах асуудлыг тусгайлан авч үзсэн төдийгүй ийм төрлийн хөдөлмөр эрхлүүлсний улмаас хүүхдийн амь нас, эрүүл мэнд нь хохирсон бол гэм буруутай этгээдээс нөхөн төлбөр гаргуулах эрх зүйн орчинг бүрдүүлэх зорилт тавьсан билээ.

Энэхүү зорилтыг хэрэгжүүлэх үүднээс Мэргэжлийн хяналтын Ерөнхий газраас үйл ажиллагааныхаа төлөвлөгөөнд морь унаач хүүхдүүдийн аюулгүй байдлыг хангаж хяналт шалгалт хийх ажлыг орон даяар зохион байгуулахаар тусгасан юм.

Монголын үндэсний их өв соёл, түүх, монгол хурдан морины уралдаан, уяачдын эрдэм ухааныг дэлхий нийтэд сурталчлан таниулах нь монгол хүн бүрийн хувьд нэр төрийн хэрэг хэдий ч Монголын Морин Спорт, Уяачдын Холбооны салбар холбооноос 21 аймаг, 360 гаруй сумын уяачид хурдан хүлэг морьдоо уяж үндэсний их баяр наадамд оролцох гэж байгаа энэхүү үед морь унаач хүүхдийн эрүүл мэнд, амь нас, эрх ашгийг хамгаалах, аюулгүй байдлыг бүрэн хангах нь нэн чухал асуудал болж байна.

Үндэсний их баяр наадмын тухай хууль, Орон нутагт болох хурдан морины уралдааны явцад унаач хүүхдийн аюулгүй байдалд хяналт тавьж ажиллах журам, Үндэсний морин уралдааны морь унаач хүүхдийн хамгаалалтын хувцас, морины хэрэгсэлд тавих шаардлага МNS 6264:2011 стандарт зэргийг мөрдөн хэрэгжүүлдэггүй, мөн хурдан морь унаач хүүхэд амь нас, эрүүл мэндээрээ хохирсон тохиолдолд хохирлоо бүрэн дүүрэн нөхөн төлүүлэх, хариуцлага хүлээлгэх талаар морь уяач нартай гэрээ байгуулан ажиллах шаардлагатай байна.

Стандартчиллын үндэсний зөвлөлийн 2011 оны 28 дугаар тогтоолоор баталсан "Үндэсний морин уралдааны морь унаач хүүхдийн хамгаалалтын хувцас, морины хэрэгсэлд тавих шаардлага" (МNS 6264:2011) стандартыг хангаж ажиллахыг Морин спорт уяачдын холбоо түүний салбар хороогоор дараах асуудлыг хэрэгжүүлж ажиллахыг аймаг, нийслэл, сум, дүүргийн мэргэжлийн хяналтын газарт зөвлөж байна.

1.Үндэсний морин уралдааны морь унаач хүүхдийн хувцас, морины хэрэгсэлд тавих стандартад заасан хамгаалах хэрэгсэлээр хангахыг морь уралдуулж буй эздэд анхааруулж санамж стандартыг хүргүүлэх,

2.Хамгаалах хэрэгсэл хувцасгүй хүүхдээр морь унуулж уралдуулахгүй байхыг аймаг, нийслэл, дүүрэг сумдын Морин спорт уяачдын холбоо түүний салбар хороонд шаардах, шаардлагыг биелүүлээгүйгээс үүдэх эрсдэлийг хариуцаж ажиллахыг хуулийн хүрээнд сануулах,

3.Морин уралдааны үед тавих хяналтыг орон нутгийнхаа хүүхдийн байгууллага, үйлдвэрчний эвлэлийн хөдөлмөрийн хяналтын байцаагчидтай хамтран гүйцэтгэх,

4.Үндэсний морин уралдааны морь унаач хүүхдийн хамгаалалтын хувцас, морины хэрэгсэлд тавих шаардлага" (ММЗ 6264:2011) стандартыг хангаж ажиллаагүй уяачдын холбоо, наадмыг зохион байгуулах комиссыг хэвлэл мэдээллийн хэрэгсэлээр олон нийтэд зарлан хориглох арга хэмжээг авах

5.Морь унаж буй хүүхэд уяачдын хооронд гэрээ байгуулах ажпыг зохион байгуулж гэрээнд морь унах хүүхдийн насны доод хязгаарыг 14 настай байх, учирч болох эрсдэлийг хэрхэн зохицуулах, цалин хөлс, нийгмийн баталгааг хангах, хууль эрх зүйн актыг зөрчсөн тохиолдолд хүлээх хариуцлагыг тодорхой тусгуулах асуудлыг шийдэх

6. Гэрээг байгуулахдаа "Хөдөлмөрийн тухай хууль"-ийн 109 дүгээр зүйлд заасан дараах заалтыг хэрэгжүүлж ажиллах хэрэгтэй.

109.1 16 насанд хүрсэн хүн хөдөлмөрийн гэрээ байгуулах эрхтэй. 109 дүгээр зүйлийн дараах заалтыг хэрэгжүүлэх, Үүнд: мөн хуулийн

109.2. Энэ хуулийн 109.5-д харшлахгүй бол 15 насанд хүрсэн хүн эцэг, эх буюу харгалзан дэмжигчийн зөвшөөрөлтэйгээр хөдөлмөрийн гэрээ байгуулж болно.

109.3. Мэргэжлийн баримжаа, ажлын дадлага олгох зорилгоор 14 насанд хүрсэн хүнтэй эцэг эх, асран хамгаалагч болон хөдөлмөрийн асуудал эрхэлсэн төрийн захиргааны байгууллагын зөвшөөрөлтэйгээр хөдөлмөрийн гэрээ байгуулах

Морь унаач хүүхэд бүрийг "Үндэсний морин уралдааны морь унаач хүүхдийн хамгаалалтын хувцас, морины хэрэгсэлд тавих шаардлага" (МNS 6264:2011) стандартад заасан дараах хувийн хэрэгслээр хангах Үүнд:

Хамгаалалтын дуулга

Өвдгөвч, тохойвч

Нүдний шил

Гутал

Хамгаалалтын хувцас

Эмээл

Хазаар ташуур зэрэг нь дээрх стандартын шаардлагыг хангасан байна.

Дээрх шаардлагыг хангаагүйгээс үүдэх хариуцлагыг аймаг, нийслэл, сум, дүүргийн Морин спорт уяачдын холбоо, наадмын комисс болон морь унаач хүүхдийн эцэг эх хариуцах ёстойг зөвлөж байна.

МЭРГЭЖЛИЙН ХЯНАЛТЫН ЕРӨНХИЙ ГАЗАР