Улс, бүс, аймаг, сумдын гээд хоёр сар шахуу үргэлжилсэн найр наадам шувтрах тийшээ хандаж байна. Өнөө жил зуу гаруй сумдын тэгш ой тохиосон бөгөөд нэжгээд тооны сүржин наадмыг зохион байгуулсан юм.

Тэр бүх найр наадам өндөрлөхөд үндэсний бөхөөс тэрбумтан төржээ гэвэл та итгэх үү? Итгэхэд бэрх ч энэ үнэн. Тодруулбал шинэхэн арслан Н.Батсуурийн бай шагнал үүнийг гэрчлээд байгаа юм.

Юун түрүүнд тэрээр улсаас түрүү бөхийн бай шагналд 15 сая төгрөг авсан. Мөн нутгийн зөвлөл нь түүнд “Хүннү” хороололд дөрвөн өрөө байрыг өгсөн бол Японы “Тоёота” компани “Ланд круизер-200” маркийн авто машинаар цолыг нь мялаасан билээ. За энэ яахав. Жил, жилийн наадмын дараах хэвийн үзэгдэл.

Харин бөхчүүд тус татвараа төлдөггүй гэж хүмүүс ярьдаг.

Н.Батсуурийн хувьд 2010 оноос “Химон” констракшн гэх барилгын компанийн нэр дээр барилдаж эхэлсэн бөгөөд тус компани бөхдөө шинэхэн барьж буй “Sunshine Village” хотхондоо зургаан өрөө байр өгчээ.

“Sunshine Village” хотхоны зургаан өрөө байр нь  800 гаруй сая төгрөгийн үнэтэй. Тодруулбал тус хотхоны зургаан өрөө байр хамгийн дээд тал нь 250 м.кв талбайтай бөгөөд Үндэсний цэцэрлэгт хүрээлэнгийн ойролцоо байрлал сайтай бизнес зэрэглэлийн орон сууц учир нэг м.кв нь 3 сая 300 мянгаар тогтоогддог аж. Тэгэхээр Н.Батсуурь арслан шагнал, урамшуулад авч буй зөвхөн энэ байрныхаа татварт л гэхэд 80 сая төгрөгийг улсад өгөх ёстой болж байна. Харин тэр татвараа төлсөн үү?.

Ер нь ганц Н.Батсуурь арслан ч биш үндэсний бөхийн том жижиг наадамд түрүүлсэн үзүүрлэсэн гээд бай шагнал авсан бөхчүүд татвараа төлсөн эсэх нь тодорхойгүй байна. Үүнд Татварын Ерөнхий газар шалгалт хийх хэрэгтэй ба олон нийтэд мэдээллэхэд ч буруудах зүйлгүй.