Монголчууд бид дээр дооргүй л үндэсний үйлдвэрлэлээ дэмжих талаар ам уралдан ярьдаг. Гэтэл мөн чанартаа үүнийхээ эсрэг бодлого явуулаад байгаад гайхах хүн олон байна. Тухайлбал Монголчууд бид хэдэн жилийн өмнөөс эх орондоо “Дуобус, Монбус” зэрэг цахилгаан, шатахууны хос хөдөлгүүртэй автобус үйлдвэрлэж эхэлсэн. Үүнийг төр засаг бодлогоороо дэмжинэ гэдэг ба сайд дарга нар тасралтгүй очиж танилцах аялал хийж өөрсдийгөө сурталчилдаг. Гэтэл үнэн чанартаа уг үйлдвэрийн түүхий эд, тоног төхөөрөмжөөс өнөөг хүртэл гаалийн ба бусад татвараа авсаар байгаа гэнэ. Харин эсрэгээрээ гадаад улсаас том оврын автобус оруулж ирэхэд ямар ч татвар авахгүй байна. Үүнд гайхаж, аргаа барсан “Эрдү” ХХК-ний захирал Д.Дорждагва “Нийслэлийн нийтийн тээврийг хөгжүүлэх сангаас автобус худалдаж авах саналыг гадаад дотоодын 12 компанид хүргүүлсэн. Өнөөдөрийн байдлаар энэ худалдан авалтанд орох Япон, Швед, Белорусь, Солонгос, Турк, Монгол зэрэг улсын үйлдвэрлэгчид үнийн саналаа өгсөн. Евро-3 аас дээш хөдөлгүүртэй шаардлага хангасан автобус нийлүүлэх хамгийн доод үнэ 150 мянган ам.доллараас эхэлж байгаа. Манай компани 110 мянган доллар гэж дугарсан. Санал өгсөн компаниуд дотроо хамгийн бага нь манайх... Өнөөдөр үндэсний үйлдвэрлэлээ дэмжинэ гэж ярьдаг ч Монголд импортоор оруулж байгаа автобусны гааль, худалдааны татварыг тэглэчихдэг. Эсрэгээрээ эндээ үйлдвэрлэх автобусны сэлбэг эд ангиас гааль, худалдааны татвар авдаг. Заримдаа ажлын байр бий болгож, импортыг орлосон бүтээгдэхүүн үйлдвэрлэхийг дэмжинэ гэсэн бодлогынхоо эсрэг ажил хийгээд байгаад нь гайхдаг... Гадаадын компаниудын адил үйлдвэрлэлийн сэлбэг, эд ангиудаа татвараас чөлөөлүүлбэл бид 96 мянган ам.доллараар санал өгөх боломжтой” гэж ярьсан байна.
Сэтгэгдэл (12)