2014 оны эхэнд манай улсад 45.2 сая мал тоологдож энэ онд 16.7 сая төл хүлээн авснаар одоогийн байдлаар 61.0 сая мал намаржиж байна. Үүнээс дотоодын хэрэглээгээ хасаад 50.0 орчим сая мал өвөлжиж, хаваржих тооцоо гарсан бөгөөд ҮХААЯ орон нутагтай хамтран өвөлжилтийн бэлтгэж ажлаа эхлүүлжээ.

Одоогийн байдлаар 2713 дугуйт трактор, тракторын 3677 хадуур, 3410 тармуур, 453 хаман боогч, морин 690 хадуур,  1165 тармуур, 700 гаруй хөдөлгөөнт гар хадуур ашиглан  малчин өрх,  аж ахуйн нэгжүүд хадланд гарсан байна.  

Ус, цаг уур, орчны шинжилгээний хүрээлэнгээс гаргасан 2014-2015 оны өвөл, хаврын бэлчээрийн даацыг харахад  нутгийн 70 гаруй хувьд мал өвөлжилт, хаваржилт хэвийн байх боломжтой буюу тодорхой тооны мал гаднаас отроор орох бэлчээрийн нөөцтэй байна.

Харин нутгийн 30 орчим хувь нь өөрийн сумын нутагт мал өвөлжүүлэх боломж муу байгаа нь өөр нутагт отор нүүдэл хийх, нэмэгдэл тэжээл бэлтгэх зэргээр мал өвөлжилт, хаваржилтын ажлыг эртнээс анхаарах, зохицуулах шаардлагатайг харуулсан юм.

Даац их хэмжээгээр хэтэрсэн нутагт Баян-Өлгийн Баяннуур, Булган, Ховдын Манхан, Зэрэг, Мөст, Мөнххайрхан, Булган, Буянт, Хөвсгөлийн Төмөрбулаг, Архангайн Булган, Өгийнуур, Хашаат, Цахир, Өлзийт, Булганы Орхон, Гурванбулаг, Рашаант, Өвөрхангайн Баруунбаян-Улаан, Өлзийт, Сант, Гучин-Ус, Хэнтийн Галшар, Баянхутаг, Сүхбаатарын Мөнххаан, Дундговийн Адаацаг, Луус, Өлзийт, Дорноговийн Улаанбадрах, Сайхандулаан, Айраг, Даланжаргалан, Өмнөговийн Ханхонгор, Цогтцэций зэрэг 11 аймгийн 34 сум багтжээ.

Иймд бэлчээрийн даац хэтэрсэн дээрх сумд өвс, тэжээлээ эртнээс сайтар бэлтгэхийг орон нутгийн удирдлагууд, малчид, иргэд, фермерүүдэд ҮХААЯ-наас анхааруулж байна.