“Шинэ илион” ХХК гадаадын компани лицензийн хоёр тусгай зөвшөөрөлтэй хэрнээ өнөөдрийг хүртэл үйл ажиллагаа явуулж чадахгүй байна. Энэ нь Ашигт малтмалын газрын буруутай үйл ажиллагаанаас болж ийнхүү хохирч байна гэж тус компанийнхан үзэж байгаа юм байна. Ингээд энэ талаар тус компанийн хуулийн зөвлөх Г.Батбаяраас зарим зүйлийг тодрууллаа.

-“Шинэ илион” ХХК АМГ-ын буруутай үйл ажиллагаанаас болж үйл ажиллагаа явуулж чадахгүй байна гэж байна. Энэ талаар тодорхой мэдээлэл өгөөч?

-“Шинэ илион” компанийн эзэмшилд байх 2 ширхэг хайгуулийн  тусгай зөвшөөрлийн 9 дэхь жилийн хугацаа өнгөрсөн зургадугаар сард дууссан. Дуусахаас нь гурван сарын өмнөөс бид ашиглалтын өмнөх үйл ажиллагааны гэрээ байгуулах хүсэлтийг АМГ-т удаа дараа гаргаж байсан юм. Бидний хүсэлтийг ч шийдвэрлэж өгөх боломж байсан. Гэрээг байгуулж болох тухай хариуг ч бидэнд өгсөн байсан юм. Боломжтой гээд бид 100 гаруй сая төгрөг төлсөн байдаг. Мөн компанийн зүгээс тус газарт өнгөрсөн 3 жилд дөрвөн тэрбум төгрөгийн хөрөнгө оруулалт хийгээд үйл ажиллагаагаа явуулж байсан. Гэтэл АМГ гэрээ байгуулах гэхээр тодорхойгүй шалтгаанаар бие рүүгээ түлхсээр өнөөдрийг хүрсэн. Улмаар шинэ хуулиараа гэрээ байгуулах боломжгүй гэсэн хариу өгч байна. Уг нь бид хугацаа дуусахаас гурван сарын өмнө бүх баримтаа бүрдүүлэн хүсэлтээ гаргаж байсан шүү дээ.

-Гэрээ байгуулахгүй байгаагаа юу гэж тайлбарладаг вэ?

-Бид албан тушаалын хүнд сурталтай холбогдуулан хугацаандаа тодорхой хариу өгөх тухай гомдол гаргадаг. Тэгэхээр тэд ”АТГ-аас айж байна. Ямар нэг шийдвэр гаргахаар л АТГ ирж шалгаад байдаг. Ийм байхад бид яаж хөрөнгө оруулагч нарыг дэмжсэн бодлого явуулах юм бэ..” гэж тайлбарладаг. Энэ ч үнэн байх. Мэдээж хэн шийдвэр гаргасныхаа дараа шалгагдаж, хоригдож, байцаагдаад байхыг хүсэх вэ дээ.

-АТГ-аас айж байна гэж хэлсэн тухай баримт байна уу?

-АМГ-ын нэр бүхий албан тушаалтантай уулзахад “АТГ-аас айж байна. Ажлаа ч хийхэд хүнд болсон тухай гэж хэлсэн бичлэг нь энэ байна...” /Утсан дээрх бичлэгээ сонсгов/ АТГ-ын энэхүү бусдыг айлган сүрдүүлэх аргаар явуулж буй хууль бус үйл ажиллагаанаас болж улс орны эдийн засаг хойшилж, гадаадын хөрөнгө оруулагчид үргэж байна гэж харагдахаар байна.

-Яагаад?

-Гадны хөрөнгө оруулагчид манайд хөрөнгө оруулаад уул уурхайд томоохон бүтээн байгуулалтын ажил хийе гэхээр АМГ зөвшөөрлийг нь сунгаж өгөхгүй, янз бүрийн аргаар цуцлах, хүчингүй болгож байна. Тэдний ингэж ажиллаж байгаа шалтгаан нь АТГ гэж байна. Яагаад гэхээр нэг шийдвэр гаргахаар л АТГ шалгаад байдаг гэж байна.  АТГ янз бүрийн нэр томъёо зүүгээд хорьж  ирээд л шалгаж цагддаг нь үнэн. Улс орны хөгжилд түлхэц өгөх, иргэдэд ашиг тусаа өгөх томоохон ажил эхлүүлэх тухай санахын ч хэрэггүй болсон. Өнөөдөр “Нүүрс” хөтөлбөр гээд шинэ ажил эхлүүлсэнийхээ төлөө Ерөнхий сайдын ахлах зөвлөх Л.Гансүх олон сар хоригдож ирээдүй нь бүрхэг болсон байна. АТГ нийгмийг эрүүлжүүлэх эмчлэх гэдэг хууль зүйн утгаараа байх нь зөв боловч эрх мэдлийг хэтэрхий нэг гарт төлөвлөрүүлж хяналтгүй болохоороо улс орны хөгжилд саад хийгч дарангуйлагч хэлмэгдүүлэгч хүчин зүйл болж хувирдагийн том жишээ болж байна. Улсын прокурорын дэргэдэх Мөрдөн байцаах газар татан буугдсанаас хойшхи хэдхэн сарын хугацаанд маш олон сөрөг үр дагавар бий болж байна. Энэ байдлыг нэн даруй засахгүй бол 1937 оны хэлмэгдүүлэлт шиг нөхцөл байдал бий болохоор харагдаж байна.