Өчигдөр Орхон аймгийн цагдаагийн газрын жижүүрийн шуурхай албанд өглөөний 09 цагийн үед тус аймгийн Жаргалант сумын иргэн Ж нь “...Жаргалант сумын Улаантолгой багийн Тариаланчдын гудамжинд байрлах өвөлжөөнөөс 115 тооны хонь ямаагаа хулгайд алдсан” гэсэн дуудлага ирүүлжээ. Дуудлагын дагуу жижүүрийн шуурхай бүрэлдэхүүн хэргийн газарт үзлэг, шалгалтыг явуулсан байна.
Шалгалтаар Орхон аймгийн Жаргалант сумын Улаантолгой багийн Тариаланчдын гудамжинд байрлах өвөлжөөнөөс 115 тооны хонь, ямаа хулгайд алдагдсан болох нь тогтоогдсон байна. Мөн хэргийн газарт үзлэг хийж, гэмт этгээдүүд нь 3-4 хүн байсныг тогтоон, гутлын мөрийг илрүүлэн бэхжүүлж, цасан дээрх гутлын болон малын мөрийг дагаж явснаар тухайн малын хулгайн гэмт хэрэг үйлдэхдээ тээврийн хэрэгсэл ашигласан байсныг тогтоожээ.
Хохирогч иргэн Ж нь 2012 оны нэгдүгээр сарын 13-ны өдөр малаа 18 цагийн орчим бэлчээрээс нь авчраад хашаандаа оруулсан байна. Өглөө босоод малаа үзтэл хулгайд алдагдсан байжээ. Иймд цагдаагийн байгууллагад мэдэгдсэн аж. Хулгайд алдагдсан малын дийлэнх хонь хээлтэй эм хонь, мөнгөн дүнгээр үнэлвэл арав орчим сая төгрөг болох байжээ.
Хэргийг үйлдсэн этгээдүүдийг олж тогтоохоор аймгийн цагдаагийн газрын нийт бие бүрэлдэхүүн түргэн цугларалт хийж, аймгийн нутаг дэвсгэрт гэр хороолол, мал мах худалдан борлуулах захуудаар хяналт тавьж ажилласан байна. Ингэснээр гэмт этгээдүүдийг хулгайлсан малаа хашаандаа авчирч нядалж байхад цагдаагийн алба хаагчид таслан зогсоон саатуулжээ.
Хэргийг 1978 онд Дархан-Уул аймгийн Дархан суманд төрсөн, мэргэжилгүй, эрхэлсэн тодорхой ажилгүй, Орхон аймгийн харьяат Г үйлдсэн байжээ. Түүний орон байранд үзлэг хийж, хулгайд алдагдсан 115 хонь, ямаанаас 11 тооны хонийг нядалсан, мөн хэрэг үйлдэхдээ ашигласан тээврийн хэрэгсэл зэргийг олж тогтоосон байна. Тэрээр хэргийг 1987 онд Орхон аймагт төрсөн, эрхэлсэн тодорхой ажилгүй С, 1987 онд Сэлэнгэ аймагт төрсөн, эрхэлсэн тодорхой ажилгүй, Б нартаа хамтран үйлдсэн аж. Тэднийг цагдан хорьж, таслан сэргийлэх арга хэмжээ аван, шалгах ажиллагааг үргэлжлүүлж байна.
Сэжигтэн Г нь төрсөн дүү С, түүний найз Б нарт мод ачилцаад өг гэж худлаа хэлээд гэрээс нь дагуулан авч яваад, улмаар ятган хулгайн хэргийг үйлдсэн байжээ.
Мөн хэргийг шалгах явцад сэжигтэн Г нь 2012 оны нэгдүгээр сарын 12-13-нд шилжих шөнө Жаргалант сумын иргэн Б-гийн хашаанаас үхэр хулгайлан, махыг нь “Хүлэг” хүнсний захад зарсан болохыг нь тогтоосон байна. Мөн уг үхрийн дөрвөн шийр сэжигтний орон байранд байсныг хураан авч, шалгалтын ажиллагааг үргэлжлүүлж байгаа аж.
Б.Чимэг
