Австралийн шинэ Ерөнхий сайд Тони Эботт Индонез улсад айлчлахаар болсон байна. Тэрээр айлчлалынхаа зорилгыг хоёр орны цагаачлалын хатуу бодлогын талаар хэлэлцэнэ хэмээн тодорхойлжээ.

Өнгөрсөн баасан гарагт Энэтхэгийн Мумбай хотод барилга нурснаар олон хүн дарагдсан билээ. Тэгвэл нурангид амиа алдагсдын тоо өчигдрийн байдлаар 61-д хүрсэн хэмээн эрх баригчид мэдээллээ.

Италийн Ерөнхий сайд асан Сильвио Берлусконийн Эрх чөлөөт ард түмэн намын харьяат сайдууд Засгийн газраас огцрохоор шийджээ. Тэд энэ тухайгаа бямба гарагт албан ёсоор мэдээлсэн хэмээн Дотоод хэргийн сайд Ангелино Алфано мэдэгдсэн байна.

Исламист буутай этгээдүүд Нигерийн зүүн хойд хэсгийн коллежид аймшигт халдлага үйлдэж тавиад оюутныг буудан хөнөөсөн байна. Иобе муж улсын Хөдөө аж ахуйн коллежийн оюутнуудыг дотуур байрандаа унтаж байхад нь буудаж хөнөөсөн хэмээн цагдаагийн газраас мэдээлжээ.