Саяхан зам гарч байсан хэсэг адууг хятадууд машинаар дайрсан хэрэг Өвөрмонголд гарч, зураг нь интернет сүлжээгээр цацагдсан. Энэ мэт хэрцгий хэрэг Өвөрмонголд олон гарах болсон байна. Тухайлбал энэ бичлэг дээр зам гарч байсан хонь, ямааг хятад жолооч том ачааны машинаараа хэнэг ч үгүй дайрчээ.

НҮБ-ын Ерөнхий нарийн бичгийн дарга Бан Ги Мүн өчигдөр Сирийн асуудлаар мэдэгдэл хийлээ. Тэрээр хэрвээ НҮБ-ын шинжээчдийг дүгнэлтээр Сири химийн зэвсэг хэрэглэсэн нь тогтоогдвол олон улс хариу үзүүлэх нь зүйтэй гэсэн байна.

Японы “Фукушима 1” атомын цахилгаан станцыг хариуцсан “Тепко” компани хордсон усны шинэ цэгийг нээсэн хэмээн мэдээллээ. Ерөнхий сайд Шинзо Абэ атомын цахилгаан станцыг хяналтдаа авсан хэмээн мэдээлсний дараа энэхүү мэдэгдлийг хийсэн бөгөөд хордсон усны голомт үйлдвэрийн цогцолборт багтаж байгаа гэлээ.

Ерөнхийлөгч Хассан Роуханийн кабинет Иранд фэйсбүүк хуудсуудыг нээсэн нь эрх баригчдын хувьд анхны тохиолдол боллоо.

АНУ-ын Төрийн нарийн бичгийн дарга асан Хилари Клинтон Сирийн асуудлаар анх удаа биечлэн мэдэгдэл хийлээ. Олон улсын ажиглагчид түүний мэдэгдлийг Америкийн эрх баригчидтай үгсэн ярьсан мэт хэмээн тодорхойлж байна.