Сангийн сайд Б.Жавхлан гадаад валютын албан нөөц нэмэгдэж буйг хэлж байгаа ч бодит амьдрал дээр “ноён” доллар галзуурч байна. Монголбанкны зарласан албан ханшаар өнөөдөр 1 ам.доллар 3502 төгрөгтэй тэнцлээ. Дэлхийн зах зээл дэх нүүрсний үнийн уналт Монголын эдийн засагт ханшийн савлагаагаар ийнхүү хүчтэй мэдрэгдэж байна. Гэтэл уул уурхайгаас өөрөөр валютын орох урсгалыг нэмэх боломж манайд алга. Хөрөнгө оруулагчдаа бид “хөөгөөд” гаргачихсан. Монгол Улсын төрийн шийдвэрийн тогтворгүй байдал үнэндээ хөрөнгө оруулагчдыг үргээж байна. Өчигдөр гаргасан шийдвэрээ өнөөдөр үгүйсгэж, өмнөх гаргасан бодлогоо маргааш нь баллуурддаг учраас бидэнд хэн ч итгэхгүй байна. Гадаадын хөрөнгө оруулагчид дайжихын зэрэгцээ дотоодын бизнесүүд ч төрийн тогтворгүй бодлогын золиос болж байна. Саяхан Ухаа худагийн лиценз тойрсон сэдвээр ярьсан Хууль зүй, дотоод хэргийн сайд О.Алтангэрэлийн мэдэгдлийн дараа л гэхэд “Энержи Ресурс” компанийн Хонгконгийн хөрөнгийн бирж дэх хувьцааны үнэлгээ 150 гаруй сая ам.доллараар унасан байдаг. Энэ бол төдий хэмжээний валютын эх үүсвэр Монголд орж ирэх боломжгүй болсон л гэсэн үг. Хөрөнгө оруулалтыг урьж залдаг хэрнээ, хөрөнгө оруулагчдыг хамгаалах тогтвортой бодлогогүй байгааг эдийн засагчид ч анхааруулсаар. Гаднынхан ч бас хэлсээр байна.

Саяхан Тэргүүн шадар сайд бөгөөд Эдийн засаг, хөгжлийн сайд Л.Гантөмөр Монголд суугаа дипломат төлөөлөгчийн газрын удирдлагуудтай уулзалт хийх үеэр тэд биднийг ийн дүгнэсэн.

Европын холбооноос Монголд суугаа төлөөлөгчийн газрын Хамтын ажиллагааны хэсгийн ахлагч Адриен Моргуэс

Шүүх, шүүхийн эрх зүйн орчин, хөрөнгө оруулалтын эрх зүйн орчныг сайжруулах тал дээр хүлээлттэй байна. Шүүхийн маргаантай байгаа хөрөнгө оруулагчид бидэнд хандаж асуудлаа хурдан шийдвэрлүүлэх хүсэлтэй байгаагаа илэрхийлдэг.

ИБУИНВУ-аас Монголд суугаа Элчин сайд Фиона Блайт

Нээлттэй, шударга байж чадвал олон компанийг Монгол руу оруулж ирэх боломжтой. Шинэ Засгийн газар, шинэ парламент гарч ирээд хуулиа ойр ойрхон өөрчлөөд байдаг нь хамгийн том асуудал болж байна. Хөрөнгө оруулагчдад нэр хүндээ алдвал эргүүлж олоход хэцүү. Нэгэнт хийсэн гэрээгээ хэсэг хугацааны дараа ширээн дээр гаргаж тавиад эргэж харна гэдэг нь хөрөнгө оруулагчдад эрсдэл болж байгаа.

Австралийн Элчин сайдын яамны дэд тэргүүн Эндрю Бэрримэн

УИХ-ын гишүүд гадаадын хөрөнгө оруулалт нь иргэдэд хэрхэн үр өгөөжөө өгдөг вэ гэдгийг таниулах, ойлгуулах ажил хийх ёстой гэж бодож байна.

Канадаас Монголд суугаа Элчин сайд Сандра Шуфани

Чөлөөт зах зээл гэж юу болох, энэ нь ямар үр өгөөжтэй  байдаг талаар олон нийтдээ тодорхой ойлголт өгөх бодлого хэрэгжүүлэх шаардлагатай байна. Тэгэхгүй бол Монгол Улс дотроо хоёр хуваагдчихаад байна. Ардчилсан улс орон гэдэг утгаараа ялгаатай үзэл бодол байхыг хүлээн зөвшөөрч хүндэтгэнэ. Гэхдээ худал мэдээлэл тараах ажил их явагдаж байна. Үүний эсрэг олон нийтдээ үнэт бодит мэдээлэл, ойлгох өгөх, сэтгэл зүйтэй нь ажиллах шаардлагатай байна.

А.Сүх