“Дарханы Төмөрлөгийн Үйлдвэр" ХХК-ийн эзэмшдэг Төмөртэйн ордын геологи судалгааны ажлыг 1960 -аад оноос эхлүүлж 30 гаруй жилийн дараа нарийвчилсан хайгуулын ажлаар нөөцийг нь тогтоосон.

Өнгөрсөн жилүүдэд тус ордод олон улсын Жорк стандартад нийцүүлэн хийсэн геологи хайгуулын ажлын хүрээнд нийт 7880 уртааш метр өрөмдлөгийн ажил хийлээ. Үүний үр дүнд өнөөдрийн байдлаар Төмөртэйн ордын Зүүн хэсэгт нийт В болон С зэрэглэлээр 52.57 хувь дундаж агуулгатай 147.79 сая.тн хүдэрт 77.70 сая.тн төмрийн нөөцийг нэмэлтээр тогтоон Эрдэс баялгийн мэргэжлийн зөвлөлөөр батлууллаа. Ингэснээр Төмөртэйн хүдрийн уурхай нь нийт 250 гаруй сая тонн төмрийн хүдрийн нөөцтэй болж уурхайн ашиглалтын хугацаа нь дахин 30 жилээр нэмэгдэж байна.

Цаашид ордын нөөцийг нэмэгдүүлэх хайгуулын ажлыг үргэлжлүүлэн хийхээр төлөвлөж байгаа бөгөөд нөөцийг 500 сая тонн хүртэл нэмэгдүүлэх боломж байгааг урьдчилсан судалгаагаар тогтоогоод байна. Тус ордын төмрийн хүдрийн шинж чанар нь ган боловсруулах үйлдвэрт хамгийн тохиромжтой бөгөөд ийнхүү Монгол улсад шинээр баригдах ган боловсруулах үйлдвэрийн түүхий эдийн найдвартай нөөцийг бүрдүүлж чадлаа.