Уул уурхайн салбарын өсөлт саарч, гадаад худалдааны ашиг буурсан энэ үед Монгол Улсын эдийн засгийн бодит түшиц нь хөдөө аж ахуйн салбар болж хувирч байна. 2025 оны эхний улирлын байдлаар хөдөө аж ахуйн салбар 35.6 хувиар өссөн нь өмнөх оны -28.7 хувийн уналтаас эрс эргэж, салбарт сэргэлт гарч байна. Энэ сэргэлт зөвхөн тоон үзүүлэлт биш эдийн засгийн суурь бүтэц хэрхэн өөрчлөгдөж байгааг илтгэх бодит үзэгдэл юм.
Монгол Улсын эдийн засгийн нийт өсөлт 2025 оны эхний улиралд 2.4 хувьтай гарсан бол хөдөө аж ахуйн салбар ганцаараа 35.6 хувийн өсөлттэй гарсан нь онцгой үзүүлэлт. Уул уурхай, барилга, үйлдвэрлэлийн салбаруудын хэлбэлзэлтэй үед хөдөө аж ахуйн салбар тогтвортой өсөлт үзүүлж, эдийн засгийн тулгуур багана болж эхэлж байна. ХХААХҮЯ-наас хэрэгжүүлж буй “Хүнсний хувьсгал”, “Цагаан алт”, “Атрын IV аян”-ы хэрэгжилт, бодлогын үр дүн ийнхүү салбарын эдийн засгийн сэргэлтийн гол түлхүүр болж байгаа юм.
Тус салбарт өнөөдөр 600 мянга орчим хүн ажиллаж байгаа нь Монголын нийт ажиллах хүчний гуравны нэгтэй тэнцэх тоо. 2025 оны эхний улиралд хөдөлмөрийн зах зээлд өмнөх оны мөн үеэс 48 мянгаар өссөн нь, үүнээс 37 мянган хүн зөвхөн хөдөө аж ахуйн салбарт шинээр нэмэгдсэн нь энэ салбарын бодит идэвхжлийг илтгэнэ.
Хөдөө аж ахуйн салбарын сэргэлт зөвхөн ажиллах хүч нэмэгдэхэд бус, орон нутгийн эдийн засгийг чирж, хүнсний хангамжийг тогтворжуулж, импортыг орлох бодлогын гол хэрэгжүүлэгч болж байна. Мал аж ахуй, газар тариалангийн бүтээгдэхүүн өнөөдөр зөвхөн дотоодын хэрэгцээг хангаад зогсохгүй, экспортын шинэ боломж нээж, валютын эх үүсвэрийн хоёр дахь багана болох суурийг тавьж буй.
Эдийн засгийн бодлого тодорхойлогчид хөдөө аж ахуйг үнэхээр хөгжлийн тэргүүлэх чиглэл болгох цаг хэдийнэ иржээ. Хэрвээ хөдөө аж ахуйг зөв бодлогоор, технологийн шинэчлэлээр дэмжиж чадвал энэ салбар Монголын эдийн засгийг уул уурхайгаас илүү тогтвортой суурь болон хувирч чадна. Учир нь энэ салбар бол зөвхөн бүтээгдэхүүн үйлдвэрлэдэггүй, хүн амын орлогыг тэнцвэржүүлдэг, хүнсний аюулгүй байдлыг хангадаг, уламжлалт соёл, амьдралын хэв маягийг хадгалдаг үндэсний дархлаа юм.
