24tsag.mn сайтын зүгээс уншигч та бүхэнд Тулгар төрийн 2234, Их Монгол Улсын 819, Үндэсний эрх чөлөө, тусгаар тогтнолоо сэргээн мандуулсны 114, Ардын хувьсгалын 104 жилийн ой, Үндэсний их баяр наадмыг угтан "Наадам айсуй" цуврал нийтлэлийг хүргэж байна. Энэ цувралаар төрийн наадамд Үндэсний сурын харваачдын гаргасан одоог хүртэл "эвдэгдээгүй" түүхэн амжилтын эздийг танилцуулж байгаа юм. 

 МУГТ цол хүртсэн анхны харваач,

Төрийн наадамд 6 түрүүлсэн Дархан мэргэн Ч.Мөнхцэцэг

Монгол төрийн наадамд цэц мэргэнээ сорьж, хамгийн олон удаа түрүүлсэн нэгэн бол Сэлэнгэ аймгийн Ерөө сумын уугуул, Дархан мэргэн, Гавьяат тамирчин Чойжинсүрэнгийн Мөнхцэцэг юм. Зургаан удаа манлайлсан түүний амжилт одоо ч эвдэгдээгүй байна. Дархан мэргэн Ч.Мөнхцэцэгийн алдрын замнал Ардын хувьсгалын 57 жилийд ойн баяр наадамд хоёр дугаар байрт шалгарсан явдлаар эхэлж байжээ. Улмаар 1982 онд тэрбээр улсын наадмаас анхны түрүүгээ хүртэж, улсын мэргэн цол хүртсэн аж.

Түүний хувьд 1985 оны улсын наадамд түрүүлэн хошой мэргэн, 1993 онд гоц мэргэн, 1994 онд гарамгай мэргэн, 1997 онд даяар дуурсах мэргэн, 1999 онд дархан мэргэн цолыг тус тус хүртсэн байдаг. Ийнхүү харваач Ч.Мөнхцэцэг үнэхээр л даяар дуурсагдах зургаан түрүүг Үндэсний сурын харвааны түүхэнд дархалсан байна. Тэрбээр тэшүүр, харваа хоёрыг хослуулан хичээллэж байснаараа онцлог болсон тамирчин агаад түүний гэр бүлийнхэн ч мэргэн цолтой харваачид юм. 

Түүнчлэн Дархан мэргэн Ч.Мөнхцэцэг улсын наадамд 1978, 1992, 1995, 1996  онд II, 1980, 1986, 1988, 2000 онд III байр эзэлж байжээ. Мөн хамгийн олон удаа буюу улсын наадамд 16 удаа шөвгөрч байжээ. Түүнээс гадна эрхэм харваачийг мөнхөд дагах бас нэгэн алдар бол тэрбээр энэхүү спортын "анхны" МУГТ /1998/ юм.