Улс үндэстний түүх болон соёлын шинжилгээнд тулгуурласан олон улсын шинэ судалгааны үр дүнд Монгол Улс янз бүрийн муу зуршилд донтох магадлал хамгийн бага таван улсын тоонд багтсан нь олны анхаарлыг татлаа. Судалгааны явцад мэргэжилтнүүд сэтгэцэд нөлөөт бодис болон мөрийтэй тоглоомын хэрэглээний түүхэн баримтууд, ДЭМБ, Сэтгэцийн Эрүүл Мэндийн Судалгаа, “Our World in Data” сайтаас авсан статистик мэдээллүүд, үндэстний уламжлал, нийгмийн зан төлвийг илэрхийлсэн соёлын болон шинжилгээний эх сурвалжууд, мөн донтох хандлагын нийгэмд үзүүлэх нөлөөллийн харьцуулсан үнэлгээ зэргийг ашигласан байна.

Судалгааны дүнгээр Монгол, Япон, Энэтхэг, Өмнөд Солонгос, Финланд зэрэг орнууд хамгийн тогтвортой, донтох магадлал багатай хэмээн тодорхойлогдсон. Эдгээр орнуудын нийгэмд өөрийгөө хянах, хариуцлага хүлээх соёл гүн суусан байдаг бөгөөд үүнийг түүхэн, соёлын болон шашны хүчин зүйлс дадал болгон суулгажээ. Монголчууд эртнээс бие даасан, бэрхшээлтэй орчинд амьдарч ирсэн нь тэдэнд тэсвэр хатуужил, цэгцтэй сэтгэлгээ, сахилга бат, өөрийгөө бүрэн хянах чадварыг төлөвшүүлжээ.

Үүний үр дүнд монголчууд сэтгэл хөдлөл, үйлдлээ хянах чадвартай болж, согтууруулах ундаа, тоглоом, чөлөөт цагаа хэтрүүлэлгүйгээр эдэлж сурах зэрэг уламжлал тогтжээ. Судлаачид монголчуудыг нийтэд нь өндөр түвшний хувийн сахилга баттай, логик сэтгэлгээтэй гэж дүгнэсэн байна. Энэ нь сурталчилгаа, нийгмийн чиг хандлага, манипуляци, эсвэл трэнд зэрэг гадаад хүчин зүйлсийн нөлөөг саармагжуулдаг.

Судалгаанд дурдсанаар, түүхэндээ төвлөрсөн засаглал давамгайлсан нийгмүүдэд хожим идэвхгүй, дагасан зан үйл давамгайлж, хувь хүний хариуцлага сулрах хандлага ажиглагддаг. Энэ нь донтох зан үйлийг өдөөх эрсдэл болдог аж. Харин Монголын хувьд бие даасан сэтгэлгээ, үйлдэлтэй байх хэв маяг түүхэн соёлын салшгүй хэсэг байсаар ирсэн нь сэтгэлзүйн дархлааг нь өндөр түвшинд хадгалахад хувь нэмэр оруулжээ.