Нийслэлийн авто замын хөдөлгөөний ачааллыг бууруулж, хотын дэд төвүүдийг холбох “Шинэ тойрог зам” төсөл нь Монгол Улсын Засгийн газрын мөрийн хөтөлбөрт багтсан томоохон бүтээн байгуулалт юм. Уг төсөл нь Улаанбаатар хотын төвлөрлийг сааруулах, авто замын түгжрэлийг бууруулах ач холбогдолтой бөгөөд “Нэгдүгээр тойрог зам”, “Хоёрдугаар тойрог зам” гэсэн хоёр үндсэн чиглэлд хэрэгжих юм.
“Нэгдүгээр тойрог зам” төслийн техник, эдийн засгийн үндэслэлийг бүрэн боловсруулж дууссан бол “Хоёрдугаар тойрог зам” төслийн ТЭЗҮ-ийн ажил одоогоор 50 хувийн гүйцэтгэлтэй үргэлжилж байна. ТЭЗҮ-ийн хүрээнд инженерийн судалгаа, байгаль орчны төлөв байдлын үнэлгээ, ус зүйн урьдчилсан судалгаа, түүх, угсаатны зүй, археологи болон палеонтологийн судалгаа, зорчилт болон тээврийн хэрэгслийн хурдны судалгаа, инженер-геологийн дүгнэлт, мөн трассын дагууд 1:500 масштабтай байр зүйн зураглал зэрэг нийт 10 төрлийн судалгаа, үнэлгээ, зураг төслийн ажил хийгдэж байна.
Төслийн хоёрдугаар тойрог зам нь хотын захын бүсийг хамарсан, хоёр чиглэлтэй маршрутаар хэрэгжихээр төлөвлөгдсөн. Баруун чиглэлийн маршрут нь 22-ын товчооноос эхэлж, Тахилтын авто зам, Найрамдлын зам, Нарангийн гудамжны төгсгөл, Улаан чулуутын хогийн цэг орчмоор дайран өнгөрч, Баянхошууны уулзварт хүрч нэгдүгээр тойрог замтай холбогдоно. Харин зүүн чиглэлийн маршрут нь Баянзүрх дүүргийн 24 дүгээр хороо, Сэтгэцийн эрүүл мэндийн төвийн орчим, Улиастай, Гачууртын чиглэлд үргэлжилж, эцэст нь Туулын хурдны замтай огтлолцохоор төлөвлөгдсөн.
Эдгээр чиглэлүүд нь хотын зүүн болон баруун захын бүсүүдийг төвийн замын ачаалалд нөлөөлөхгүйгээр холбож, нийтийн шилжилт хөдөлгөөнийг дэмжих, захын хороололд амьдарч буй иргэдийн тээврийн хүртээмжийг сайжруулах, амьдралын чанарыг дээшлүүлэхэд чиглэсэн бүтээн байгуулалт болох юм.
Трассын хувилбаруудыг тодорхойлохдоо тээврийн эрэлт, зангилаа, газарзүйн байршил, геологийн нөхцөл, байгаль орчны нөлөөлөл, газар ашиглалт, хот төлөвлөлтийн бодлого болон нийгэм, эдийн засгийн үр ашгийг цогцоор нь авч үзэн судалгаа хийжээ. Үүний үр дүнд зүүн чиглэлд 5.7 км, 5.8 км, 6.6 км урттай гурван хувилбар, баруун чиглэлд 14.9–15.1 км урттай гурван трассын сонголтыг боловсруулаад байна.
Урьдчилсан тооцооллоор “Хоёрдугаар тойрог зам” төсөл бүрэн хэрэгжсэнээр нийслэлийн авто замын хөдөлгөөний түгжрэлийг 23 орчим хувиар бууруулах боломжтой гэж үзэж байна. Тиймээс уг төсөл нь Улаанбаатар хотын тээврийн сүлжээг оновчтой зохион байгуулах, авто замын ачааллыг тэнцвэржүүлэх, ирээдүйн хөгжлийг дэмжих нэн шаардлагатай бүтээн байгуулалтын нэг хэмээн үнэлэгдэж байна.
Эх сурвалж: Нэгдсэн төслийн удирдлагын газар
