Автотээврийн хэрэгслийн гэрэл нь харанхуй нөхцөлд жолоочид замын гадаргууг тод сайн харагдуулах, жолоочид тухайн автомашинд ямар нэгэн эвдрэл гэмтэл үүссэнийг анхааруулах гэрлээр санхуулах, тээврийн хэрэгсэл ямар үйлдэл хийх гэж байгааг бусдад анхааруулах зэрэг олон анхааруулгыг жолоочид хүргэдэг.
Гэтэл жолооч нар тээврийн хэрэгсэлдээ нэмэлт гэрэл хийх, наалт наах зэрэг стандартын бус зөрчлийг ихээр гаргадаг.
Тээврийн хэрэгсэлд түгээмэл хэрэглэгддэг ламп нь H4 ламп юм. Уг гэрлийг бүх төрлийн автомашины 80-90% нь ашигладаг.
Үзэгдэх орчин хязгаарлагдмал, шөнийн цагт жолооч нарт хамгийн хүндрэлтэй зүйл нь эсрэг урсгалаас ирж буй автомашины гэрлийн гялбаанд орох, их гэрлийн холын тусгал нь хэмжээндээ тусахгүй байх, муу гэрэлтэйгээс болж үзэгдэх орчин хязгаарлагдах зэрэг байдаг.
Эдгээр нь зам тээврийн осол гарах бас нэгэн шалтгаан нөхцөл болж байна.
Хяналт шалгалтын үеэр Сонгинохайрхан дүүргийн техникийн хяналтын үзлэгийн төвийн инженер Б.Ербулан, Тээврийн цагдаагийн албаны Замын цагдаагийн газрын Орон нутгийн замын хяналтын ахлах зохицуулагч, цагдаагийн ахмад Э.Чинбаатар болон албан хаагч нар жолооч нарт стандарт гэрлийн талаар мэдээлэл өгч, зөрчлийг газар дээр нь арилгаж ажиллалаа.
Автотээврийн хэрэгслийн гэрэлтүүлэх хэрэгслийн өнгө нь MNS 4598:2025 стандартаар:
- Холын гэрэл /урд/: цагаан
- Ойрын гэрэл /урд/: цагаан
- Манангийн гэрэл /урд/: цагаан, шар
- Манангийн гэрэл /хойд/: улаан
- Ухрах гэрэл /хойд/: цагаан
- Дохионы гэрэл /урд/: шар, улбар шар
- /Хойд/: шар, улбар шар
- /хажуугийн/: шар, улбар шар
- Зогсох гэрэл /хойд/: улаан
- Оврын гэрэл /урд/: цагаан
- Оврын гэрэл /хойд/: улаан
- Хажуугийн гэрэл: шар эсвэл улаан
- Бүртгэлийн дугаарын тэмдгийн гэрэл /хойд/: цагаан өнгөтэй байна гэж заасан байдаг.
Гэрлийн тусгалд нөлөөлдөг зүйлс нь цайр болон гэрлийн тохиргоо юм. Автотээврийн хэрэгслийн их гэрлийн цайр бүдгэрсэн, тохиргоо алдагдсан тохиолдолд өндөр чадалтай гэрэл хийсэн ч тусгал сайжрахгүй.
Тиймээс автотээврийн хэрэгсэл эзэмшигч нар замын хөдөлгөөнд оролцохдоо бие биенээ хүндэтгэж 100-150 метр ойртоход гэрлээ шилжүүлж, зориулалтын гэрэл, лампыг хэрэглэж, автотээврийн хэрэгслийнхээ гэрэлтүүлгийн бүрэн бүтэн байдлыг мэргэжлийн байгууллагаар шалгуулж замын хөдөлгөөнд оролцохыг зөвлөж байна.
