Энгийн бүхэн бусдын хайрыг татаж, өөрийн эрхгүй хүндлэх мэдрэмжийг төрүүлдэг. Өөрийнхөөрөө, нээлттэй, харилцаа хандлага нь зөв нэгэнтэй уулзах төдийд л “соронз” мэт татагддаг нь хүмүүн бидний харилцааны эхлэл байх. Түймрийн голомтод үүрэг гүйцэтгээд явж байсан олон залуусаас түүний нүд хамгийн ихээр сэтгэл татсан юм. Түүнийг дэслэгч Э.Отгон-Эрдэнэ гэдэг. Тэрбээр Сэлэнгэ аймгийн Онцгой байдлын газрын Гал түймэр унтраах, аврах 36 дугаар ангид салааны захирагч албан тушаалыг хашиж байна. Аймагтаа анхдагчийн түүхийг үргэлжлүүлж яваа түүнийг энэ удаагийн “Nematimes” онцлон танилцуулж байна.
-Сэлэнгэ аймгийн Сүхбаатар сумын унаган хүүхэд. Эхээс тавуулаа. Айлын отгон охин. Аймгийн I арван жилийг 2010 онд төгсөж, 2015 онд Цэцээ-Гүн дээд сургуулийг төрийн захиргаа-бизнесийн удирдлага чиглэлээр, 2022 онд ДХИС-ийн Онцгой байдлын сургуулийг Онцгой байдал-Гамшгаас хамгаалах алба мэргэжлээр суралцан төгссөн. Ээж маань спортын ордонд ажилладаг байсан учраас чөлөөт бөхийн спортоор IV ангиасаа эхлэн хичээллэж, Сэлэнгэ аймагт тус спортын анхны эмэгтэй Азийн аваргын мөнгөн медалийг авчирч, улмаар 2019 онд спортын мастер цол хүртэж байлаа. Сагсан бөмбөг, гар бөмбөг, усан сэлэлтийн спортоор хичээллэж байна.
- Цэргийн хүн болох багын мөрөөдлөө 2012 онд биелүүлсэн. Тухайн үед эгч маань Онцгой байдлын байгууллагад алба хаагч шалгаруулж авч байна гэсэн мэдээллийг өгснөөр, шалгалтад орж, тэнцсэн. Улмаар аймгийн Онцгой байдлын газрын Гал түймэр унтраах, аврах 36 дугаар ангид дуудлага хүлээн авагчаар ажлын гараагаа эхлүүлж, 2023 оноос тус ангидаа салааны захирагчийн үүргийг гүйцэтгэж байна. Ингэснээр аймгийнхаа Онцгой байдлын газрын анхны бас ганц эмэгтэй салааны захирагч болсон.
-Манай аймаг онцлогтой. Улсын хэмжээнд тохиолдож байгаа бүхий л гамшиг, ослын дуудлага бүртгэгддэг. Энэ жилийн хувьд ой, хээрийн түймрийн дуудлага ихтэй, түймрээс түймэрт алба хаагчид үүрэг гүйцэтгэж байна. Миний хувьд Түшиг, Зүүнбүрэн, Шаамар, Хушаат, Цагааннуур суманд гарсан ойн түймэрт 21 хоног бүлэгтэйгээ үүрэг гүйцэтгэсэн. Одоогоор ангийн байнгын ээлжийн бүрэлдэхүүнд ар талаа сахиад ажиллаж байна. Анх эмэгтэй хүн байж гал унтраагаад явж байх юм гээд иргэд гайхдаг байсан.
-Ээлжийн үүрэг гүйцэтгэх хугацаанд ирсэн галын дуудлагаар бүлгээ аваад гарна. Алба хаагчдынхаа өдөр тутмын бэлтгэл бэлэн байдлыг хангуулна, ангийн хуваарийн дагуу бусад арга хэмжээ, үйл ажиллагааг зохион байгуулна. Баг хамт олноо гал түймрийн голомтод удирдлага, зохион байгуулалтаар хангана гээд салааны захирагчийн албан тушаалын онцлог их. Бусдынхаа амь нас, аюулгүй байдлыг давхар хариуцна гээд эрсдэл ихтэй ч нэр хүндтэй ажил. Үүрэг гүйцэтгэсэн ажиллагаа болгоноос суралцаж, туршлагажина. Олон жил ажилласан алба хаагчдаасаа суралцана гээд харилцан багийн ажиллагаа явагдаж байдаг онцлогтой.
-Манайх ам бүл тавуулаа. Нөхөр, гурван хүүхдийн хамт амьдардаг. Миний ханийг Б.Балдандорж гэдэг. Сэлэнгэ аймгийн Сүхбаатар сумын Хилийн цэргийн 0101 дугаар ангид ажилладаг. Том хүү Б.Тэргэл энэ жил V ангид суралцана, ихэр охид болох Б.Номин-Эрдэнэ, Б.Чамин-Эрдэнэ нар цэцэрлэгийн багачууд. Ханьтайгаа хоёулаа цэргийн хүмүүс учраас бие биеэ сайн ойлгож, дэмжинэ. Ханьдаа, хөөрхөн үрсдээ хайртай шүү, хань нь, ээж нь.
-Уран зөгнөлт, үлгэрийн төрлийн ном унших дуртай. Спортоор хичээллэдэг болохоор бие бялдар, сэтгэлзүйн хувьд ч юм уу ямар нэгэн байдлаар хүндрэлтэй зүйл гардаггүй. Тэвчээртэй, багаар ажиллах чадвартай, харилцаа, хандлага зөв байвал бүх зүйл сайхан байдаг гэж боддог. Хэн нэгний хэлсэн урмын үг, бусдад зориулж хэлсэн сэтгэлийн “бэлэг” гээд амьдралын утга учрыг бүх зүйлээс мэдрэх бас бий болгох боломжтой гэж боддог.
-Онцгой бүсгүй хэмээх эрхэм алдрыг хүртэж, Онцгой залуус хэмээн олондоо нэрлэгдэх алба хаагчийн нэг нь гэж бодохоор өөрийн эрхгүй бахархал төрдөг. Нэг зорилгын төлөө хамтран үүрэг гүйцэтгэж байгаа нийт удирдлага, алба хаагч та бүхэндээ Тулгар төрийн 2234, Их Монгол Улс байгуулагдсаны 819, Үндэсний эрх чөлөө, тусгаар тогтнолоо сэргээн мандуулсны 114, Ардын хувьсгалын 104 жилийн ойн баярын мэндийг өргөн дэвшүүлье. Нийт ард, иргэддээ ой, хээрийн түймэр, үер, усны ослын улмаас үүсэж болох эрсдэлээс сэргийлж, хариуцлагатай, сэрэмжтэй байхыг уриалж байна.
