-ОРОН НУТГИЙН НИСЭХ БУУДЛУУДАД ХӨДӨЛМӨРИЙН АЮУЛГҮЙ БАЙДАЛ, ЭРҮҮЛ АХУЙН СУРГАЛТЫГ АМЖИЛТТАЙ ЗОХИОН БАЙГУУЛЛАА-

Хөдөлмөрийн аюулгүй байдал, эрүүл ахуйн хууль, тогтоомжийн хэрэгжилтийг хангах хүрээнд ИНҮТ ТӨХХК-ийн гүйцэтгэх захирлын 2025 оны 06 дугаар сарын 19-ний өдрийн А/364 дүгээр тушаалын дагуу “Хөдөлмөрийн аюулгүй байдал, эрүүл ахуйн 14 цагийн сургалт”-ыг 2025 оны 06 дугаар сарын 23-27 өдрүүдэд Мөрөн, Булган нисэх буудал, 06 дугаар сарын 30-наас 07 дугаар сарын 04-ний өдрүүдэд Мандалговь, Гурвансайхан нисэх буудлуудад ажлын байран дээр танхимаар болон виртуал хэлбэрээр хослуулан зохион байгууллаа.

Энэхүү сургалтын зорилго нь ХАБЭА-н сургалтаар орон нутгийн нисэх буудлын нийт ажилчдад аюулгүй ажиллах, ажлын байрны сөрөг хүчин зүйлсээс эрүүл мэндээ хамгаалахад зайлшгүй шаардлагатай суурь болон хууль эрх зүйн ойлголтыг өгөх мэдлэг, чадварыг дээшлүүлж, хандлагыг төлөвшүүлэх, ҮОХХ-оос урьдчилан сэргийлэх, ХАБЭА-н чиглэлээр 10 сэдэв бүхий виртуал сургалтын хичээлийг хэрхэн ашиглах арга зүйг зааж сургах, виртуал сургалтаар дамжуулан ажилтны ажлын байран дээрээ тасралтгүй суралцаж, хөгжих боломжийг олгоход чиглэгдсэн байлаа.       

Нисэхийн сургалтын төвийн зүгээс ХАБЭА-н 10 сэдэв бүхий виртуал сургалтыг нэвтрүүлснээр шинээр ажилд орж буй ажилтныг сургалтад хамруулах, сургалтын хэрэгцээ шаардлагатай ажилтнууд ажлын байран дээрээ тасралтгүй  суралцах, мэдлэгээ бататгах, давтан суралцах, аюул ослоос урьдчилан сэргийлэх чадварыг эзэмшүүлэх боломжийг олгож байна.

Энэ удаагийн сургалт нь НСТ-ийн ХАБЭА-н багшлах мэргэжилтнүүд анх удаа орон нутгийн нисэх буудалд очиж ажилтнуудад ажлын байран дээрх сургалтыг зохион байгуулснаараа онцлог бөгөөд сургалтыг орон зай, цаг хугацаанаас үл хамааран сургалтын хэрэгцээг бүрэн хангах, цаашид эдийн засгийн үр ашигтай байх давуу талыг олгож байгаа бөгөөд сургалтад Мөрөн нисэх буудлын 28, Булган нисэх буудлын 7, Мандалговь нисэх буудлын 10, Гурвансайхан нисэх буудлын 25, нийт 70 ажилтан хамрагдлаа.

Мөрөн нисэх буудал-Тус нисэх буудалд үндсэн болон дамжин өнгөрөх 67 агаарын хөлөг, 134 буулт хөөрөлт үйлдэж, 2212 зорчигч, 14741 кг тээш тээвэрлэн ажилласан. 35 удаа 24.3 тонн түлшээр агаарын хөлгийг цэнэглэсэн байна.

Булган нисэх буудал-Эхний хагас жилийн байдлаар нийт 68 нислэг хүлээн авч, 136 буулт, хөөрөлт үйлдэж, 52 удаа 2 тонн гаруй ТС-1 түлшээр агаарын хөлгийг цэнэглэсэн байна.

Мандалговь нисэх буудал-Эхний хагас жилийн байдлаар 4 авиа компаний 24 агаарын хөлөг бууж, 7 тонн гаруй ТС-1 түлшээр агаарын хөлгийг цэнэглэсэн.

Гурвансайхан нисэх буудал-Агаарын хөлгийн хөөрөх буух зурвасыг шинэчлэн нисэх буудлын хүчин чадлыг нэмэгдүүлсэн зэрэг орон нутгийн нисэх буудлын үйл ажиллагаа өргөжсөн, нислэгийн давтамж ихэссэн цаг үед ажилтнуудын ХАБЭА-н мэдлэг ойлголтыг сэргээн бататгасан, ур чадвар олгосон үр дүнтэй сургалт болж өндөрлөлөө.

Сургалтын үеэр нисэх буудлуудад аюул, эрсдэлийг хэрхэн илрүүлэх, мэдээллийг цахим хэлбэрээр цуглуулж, дата үүсгэх талаар арга зүйн зөвлөгөө өгсөн. Нисэх буудлуудын нислэгийн хөдөлгөөний удирдлагын цамхаг болон харуулын цамхаг руу гарах шат стандартын бус байсан учир хэрхэн зөв өгсөж, буух, хаалт хашилтыг хэрхэн хийх талаар зөвлөгөө зөвлөмж өгч ажилласан.

Цаашид орон нутгийн буудлуудад сургалтыг тогтмол зохион байгуулахаар төлөвлөн, ИНҮТ ТӨХХК-ийн ХАБЭА-н орон тооны бус зөвлөлтэй хамтран ажиллаж байна.