
Нидерландын алдарт зураач Винсент ван Гогийн 1890 онд зурсан бүтээл Нью-Йорк хотод болсон Sotheby’s дуудлага худалдаагаар 190.4 сая ам.доллароор зарагдаж, түүний уран бүтээлүүдээс хамгийн өндөр үнэд хүрсэн зураг боллоо.
“Châtaigniers en fleurs” буюу “Цэцэглэж буй хүрэн модод” нэртэй уг бүтээл нь Ван Гогийн амьдралынхаа сүүлчийн саруудад зурсан бүтээлүүдийн нэг юм. Зурагт Францын Овер-сюр-Уаз тосгоны гудамж дагуух цэцэглэсэн хүрэн модод, өнгө өнгийн хувцастай хүмүүсийг дүрсэлжээ.
Уг бүтээл дуудлага худалдаагаар 180 сая ам.доллар хүрнэ гэсэн урьдчилсан үнэлгээтэй байсан ч гурван минут орчим үргэлжилсэн өрсөлдөөний эцэст 190.4 сая ам.доллароор зарагдсан байна. Ингэснээр 2022 онд 117.2 сая ам.доллароор зарагдаж байсан Ван Гогийн өмнөх дээд амжилтыг давжээ.

Гэхдээ уг зургийн дуудлага худалдаа болохоос хэдхэн хоногийн өмнө өмчлөлтэй холбоотой маргаан дэгдсэн юм. Тодруулбал, 1930-аад онд Берлинд амьдарч байсан еврей хэвлэн нийтлэгч Самуэль Фишерийн өв залгамжлагчид уг бүтээлийг нацистуудын хавчлага, дарамтын улмаас санхүүгийн хүндрэлд орсон гэр бүл нь аргагүйн эрхэнд худалдсан гэж мэдэгдсэн байна.
Фишер уг зургийг 1909 онд худалдан авч байсан бөгөөд түүнийг нас барсны дараа гэр бүлийнхэн нь 1936 онд Амстердамын галерейгаар дамжуулан худалджээ. Харин одоогийн эзэмшигч Аргентины бизнесмен Карлос Педро Блакьегийн гэр бүл уг бүтээлийг 1975 онд худалдан авсан аж.
Дуудлага худалдаанаас нэг өдрийн өмнө хоёр гэр бүлийн өв залгамжлагчид харилцан тохиролцоонд хүрсэн талаар Sotheby’s мэдээлсэн ч гэрээний нөхцөлийг олон нийтэд дэлгээгүй байна. Түүнчлэн уг дуудлага худалдаагаар Пол Сезанны “Арлекин” зураг 111 сая ам.доллароор зарагджээ. Блакье-Арриетагийн гэр бүлийн цуглуулгад багтаж байсан нийт 12 бүтээл 412 сая ам.долларын орлого олсон байна.
Л.Баяр




















































