Манай сайт төрийн албаныхны цомхотголын асуудлаар яам, салбар бүрээр нь онцлон хүргэж байгаа билээ. Яахын аргагүй хөндөх ёстой энэ л сэдвийн хүрээнд БОНХЯ, МХЕГ зэргийн халаа сэлгээ, төрийн албаныхны үндэслэлгүй ажлаас халагдах байдлыг өнгөрсөн удаад илчилсэн.

Харин энэ удаад дахин Байгаль орчин ногоон хөгжил, аялал жуулчлалын яамны улс төрийн зорилготой цомхотголын талаар сөхөж байна.

Өөрөөр хэлбэл, БОНХЯ цомхотгол нэрийн дор төрийн албан хаагчдыг хоолноос нь салгасан “хатуухан” шийдвэрийн талаар танилцуухаар бэлтгэлээ.

Халагдсан ажилчид нь өргөдөл гомдлоо барьсаар хууль шүүхийн байгууллага, гомдол санал хүлээн авагчдын хаалгыг шагайж яваа энэ асуудлын гол буруутан нь Д.Оюунхорол сайд.

Анхнаасаа л мэргэжлийн бус гэдгээрээ цоллуулж муухан нэртэй сайд болсон Д.Оюунхорол цомхотгол нэрийн дор хуучин удирдлагынхаа хүмүүсийг халж орхисон юм.

Угтаа хамгаас илүү мэргэжлийн байх ёстой энэхүү салбарыг улс төрийн наймааны золиос болгож байгаа нь өдгөө иргэдийг бухимдуулаад байгаа юм.

Халагдсан ажилчдын зарим нь манай сайтад Д.Оюунхорол өөрсөдтэй нь уулзаж улс төрийн зорилготой, тохирооны үүднээс халсан гэдгээ хүлээн зөвшөөрсөнийг хэлж байсан. Улмаар сайдын тавьсан санал таалагдахгүй байгаа хэсэг нь шүүхийн байгууллагаар явж байгаагаа ч онцолж байсан билээ.

Тодруулбал,  Д.Оюунхорол халсан ажилчидтайгаа биечлэн уулзаж “Хоёр намууд тэгж тохиролцсон. Намын хүн байршуулах гэрээтэй. Улс төр хийсэн. Боломжоороо өөр ажил олж өгнө. Эсвэл албан тушаал буурч ажилла” гэсэн саналыг тавьсан байдаг.

Энэхүү саналыг нь хүлээн авсан цөөн хэдхэн хүн тушаал буурч эргэн ажилдаа орсон бол үлдсэн хүмүүс ажилгүй, шүүхийн байгууллагаар шударга үнэнийг дэнслүүлэхээр яваа гэдгийг энд дурдах нь зүйтэй биз ээ.

Тэгвэл өчигдөрхөн Өргөдлийн байнгын хороо төрийн албаныхны цомхотголын асуудлаар өч төчнөөн ажилчдаа халаад байгаа хэд хэдэн сайдуудтай ярилцлаа. Хуралдаан ширүүхэн эхэлж, ширүүхэн ч төгссөн юм.

Энэ үеэр 66  ажилтнаа халаад байгаа БОНХАЖЯ –ны сайд Д.Оюунхорол өөрийгөө өмөөрч халагдсан ажилчдын талаар ийн онцлов.

Тэрбээр “2014 оны нэгдүгээр сарын 1 ний өдрөөс 2015 оны 4-р сарын 1-ны өдөр хүртэлх хугацаанд сайд төрийн нарийн бичгийн даргын шийдвэрээр салбарын хэмжээнд өөрийн хүсэлтээр-8, суралцахаар-4, тэтгэвэрт гарсан-3, бүтэц зохион байгуулалтын өөрчлөлтөөр 29, өөр байгууллагад шилжсэн-7 гэрээт ажилтны гэрээ дуусгавар болсон-9, төрийн жинхэнэ албан тушаалын сул орон тоон дээр түр ажиллуулж байсан-5 хүн чөлөөлөгдсөн. Эдгээрийн 20 нь өмнөх удирдлагуудын үед гаргасан шийдвэрээр чөлөөлөгдсөн болно. Энэ бужигнаан өмнө нь байсан. 2015 оны Төсвийн тухай хуулиар Байгаль орчин, ногоон хөгжил, аялал жуулчлалын  сайдын эрхлэх асуудлын хүрээний харьяа Усны сав газруудын бүтэц орон тоог 23-аар цөөрүүлж,  208 албан хаагчтай байхаар цалингийн санг баталсан. Тиймээс орон нутагт ажиллаж байгаа сав газруудын ажлын нягтрал, ачааллыг тэнцвэржүүлэх үүднээс 29 сав газрыг 26 сав газар болгон бүтэц зохион байгуулалтын өөрчлөлт хийсэн.  Энэ өөрчлөлтөөр чөлөөлөгдсөн 14 албан хаагчдаас 8 хүнийг өөрсдийнх нь хүсэлтээр тухайн орон нутагт нь асуудал хариуцсан мэргэжилтнээр эргүүлэн томилж ажиллуулж байгаа.  Халаа сэлгээ хийсэн асуудал чинь биднээс эхлэлтэй биш. Хэнтий аймгийн засаг дарга АН-ын хүн. Орон нутгийн иргэд Хэнтий аймгийн  Хэрлэн голын  сав газрыг Хэнтий аймагт байгуулж өгөөчээ гэсэн хүсэлтийг гаргасан.  Орон нутгаас ирсэн саналыг үндэслэж Сав газрын даргыг  томилсон. Тийм учраас хууль  зөрчөөгүй” гэв.

Ийн түүний саналыг дагуу мэргэжилтэн болсон хүмүүсийг өөрсдийн хүсэлтээр болгож, улс төрийн тохироогоор ажлаас халсанаа хүлээсэн хэрнээ ямар ч хууль зөрчөөгүй хэмээж, мөн цомхотгол хийх ёстой байсан гэсэн хэрнээ халагдсан ажилчдын оронд хүмүүс авсан бодит дүр зургийг та бүхэн ялгаж салгах биз ээ.

Төрийн албаны халаа сэлгээний асуудал нь тухайн ажилтнаас гадна төсөвт ч сайн үр дагавар авчрахгүй байгааг учир мэдэх хүмүүс хэлж байна. Учир нь улсын төсвөөс халагдсан ажилчдад ажилгүй болсоны тэтгэмж гаргаж өгдөг. Зарим албан эх сурвалжаас харвал, нийт төрийн байгууллагуудын хэмжээнд 1500-2000 орчим төрийн албан хаагч ажлаас чөлөөлөгдсөн гэсэн статистик гарчээ. Тэгэхээр энэ хэмжээний хүмүүст ажилгүйдлийн тэтгэмжийг улс төсвөөс гаргах болоод байгаа юм. Сангийн яамнаас гаргасан мэдээгээр бол ажлаас халагдсан албан хаагчдад нэг удаагийн тэтгэмж олгох зардалд 5 тэрбум 378 сая 313 мянган төгрөг тусгасан хэмээн мэдээлж байгаа.

24tsag.mn