Засгийн газар Монгол Улсын 2026 оны төсвийн төсөл болон холбогдох хуулийн төслүүдийг боловсруулж, есдүгээр сарын 1-ний өдөр УИХ-д өргөн мэдүүлээд буй.

Цөлжилттэй тэмцэх тухай НҮБ-ын Конвенцын 17 дугаар бага хурлыг 2026 онд Монгол Улсад зохион байгуулахтай холбоотойгоор хурлын бэлтгэл ажлыг хангах, олон улсын зочид төлөөлөгчдийн аюулгүй байдлыг хангах, тав тухтай орчныг бүрдүүлэх зэрэгт зориулж 217.1 тэрбум төгрөгийг санхүүжүүлэхээр төсөвт тусгасан байна. 

Шинжлэх ухаан: Шинжлэх ухааны хүрээлэнгүүдийн нэгдсэн цогцолбор нь үндсэн 7 хэсэг барилга, байгууламжаас бүрдэж байгаа бөгөөд олон улсын стандартад нийцсэн нээлттэй, салбар дундын нэгдсэн, төрөлжсөн лабораториуд, жишиг үйлдвэрлэлийн цех, оффис, номын сан, хурлын заал, спорт заал, олдвор, дээж хадгалах агуулах, палеонтологи, археологи, одон орон судлалын музей байрлах аж..

Түүнчлэн ШУА-ийн харьяа хүрээлэнгүүд болон бусад их, дээд сургууль, эрдэм шинжилгээний байгууллагуудын 3300 орчим эрдэмтэн судлаач, албан хаагчид ажиллах хүчин чадалтай шинжлэх ухаан, технологи, инновац, танин мэдэхүйн төв болох бөгөөд барилгыг 2026 онд бүрэн ашиглалтад оруулахад шаардагдах 40.4 тэрбум төгрөг болон лабораториудын эхний ээлжид шаардлагатай тоног төхөөрөмжид 32.5 тэрбум төгрөгийг тусгажээ.