Өнөөдөр арваннэгдүгээр сарын таван. Энэ өдрийг нэгэн цагт жагсаж тэмдэглэдэг байсан Октябрийн баяраа санагалзандаа ч дурсч байгаа юм биш шүү. Мөн 1912 оны арваннэгдүгээр арын 5-нд хойд хөрш Орос гүрэн Гадаад Монголын тусгаар тогтнолыг хүлээн зөвшөөрснийг ч бас санаад байгаадаа биш юм. Харин угаасаа миний бие улстөрчдийн мууд дуртайдаа өнгөрсөн оны энэ өдөр Н.Алтанхуягийн Засгийн газрыг унагааж, Ч.Сайханбилэгийн Засгийн газар байгуулагдаж асныг санаад энэ хугацаанд юу өөрчлөгдөв гэдгийг харах гэсэндээ энэ өдрийг дурссан билээ.

Аливаа зүйлийг сайжруулах гэж сольдог.  Ухаандаа бид алс холын аянд гарахдаа машиныхаа дугуйг арай гайгүй болгох гэж л солихоос бус улам муу болгохгүй нь тодорхой шүү дээ. Тэгээд ч Н.Алтанхуягийг л унагаад орхивол хамаг бүхэн гялалзсан сайхан болохгүй юм аа гэхэд нэлээд олон төсөл урагшаа хөдөлж, монголчуудын амьдрал бага зэрэг дээшлэнэ гэж “аваргууд” ч амалж, бид ч итгэж байлаа л даа. Ялангуяа тэр Засгийг үтэр түргэн түлхэн унагаахад асар их үүрэг гүйцэтгэсэн Женко Баттулга болоод “Шонхор” фракцийнхны зүг тун анхааралтай ширтэж байлаа. Бас хүлээж байв.

Одоо ингээд нэг жилийн өндөрлөг дээрээс харж байхад сайжирсан юмаар үнэндээ маруухан байна. “Тэгсэн дээ” гээд хуруугаа дарах гэхээр юм олдож өгөхгүй зовоохыг одоо яалтай билээ. Хамгийн түрүүнд итгэл сэтгэлээрээ ширтэж байсан өмнө зүгийн нөгөө хэдэн толгой нь хөдөлсөнгүй. Таг гацлаа. Женкогийн төмөр зам ч сураггүй болов. Ажилгүйдэл ядуурал ч жинхэнээсээ нүүрлээд ирлээ дээ. Олон ч хүн амжиргааныхаа орлогоос саллаа. Үүнийг хямралтай холбох уу, хямруулахгүй байлгахаар амласан Ерөнхийлөгч Ц.Элбэгдорж, З.Энхболдын УИХ, Ч.Сайханбилэгийн Засгийн газарт хамаатуулах уу?

Энэ Засгийн газар нэг жилийнхээ ойн бариан дээр ард түмнийхээ дээлийн бүсийг, өмдний тэлээтэй нь чангалахаар шийдсэн тушаал тогтоол шийдвэртэйгээр угтаж байна.

Нэг жилийн өмнө Засгийн газрыг огцруулахад зав зайгүй гүйж байсан Р.Бурмаа, мөн хоёр тун зоригтой нөхөр өнөөдөр сайд болж, өөрөө өөрийнхөө намтарт бас нэгэн албан тушаалын нэр бичив. Өөр юу ч болсонгүй. Бүсгүй нь тариа будаа, газар энэ тэрийн маргаан хийгээд, монголчууд сүүлийн жилүүдээс анх удаа ургац алдсан дүнтэйгээр огцруулсан нэг жилийнхээ ойг угтах гэж байна. Энэ хугацаанд зоригтой сайдууд нь зураг хөргөө авсан шиг, Р.Бурмаа бүсгүй буруу зөрүү бурсан шиг л цаг хугацааг өнгөрөөв. Ер нь энэ Засгийн газар юу хийв гэхээр Ерөнхий сайд маань Буянт-Ухаад айлчилж, хэсэг хүнийг сэтгүүл гаргасан хэргээр ажлаас нь хусч байсан явдал л санаанд тодхон үлдсэн байна. Харин одоо эрхэм Ерөнхий сайд та нэг жилийн дотор юу хийв гэвэл мань хүн аймаг орон нутаг, Улаанбаатар нийслэл, хувийн үйлдвэрүүдийн хийсэн жаал жуул юмыг манай засаг хийлээ хэмээн сонин хэвлэлээр өдөр шөнөгүй бөмбөгдөх байх. Ийм өвчин манайхны гэм биш зан.

Мөн энэ Засгийн газар нэг жилийнхээ ойн бариан дээр ард түмнийхээ дээлийн бүсийг, өмдний тэлээтэй нь чангалахаар шийдсэн тушаал тогтоол шийдвэртэйгээр угтаж байна. Цалин хасахаар боллоо шүү дээ. Олон ч газрыг цомхотголоо. Ингэснээр төр хожиж байгаа юм уу. Ерөөсөө төр гэдэг чинь ард түмнийхээ төлөө зүтгэх ёстой тэрэгний морь, буулганы үхэр биш юм гэж үү. Өнөөдөр ажилгүй болсон нэг нөхрийн ард хэдэн хүн байгаа билээ. Хямрал гэж нүдэнд харагдахгүй нөхрийн нөлөөгөөр хэдэн аж ахуйн нэгж хаалгаа бариад байгаа билээ. Тиймээс ийм хүмүүст ажил олдох уу. Олдохгүй. Үүнийг Засгийн газар маш сайн мэдэж байгаа. Тэгсэн хэдий ч өөрсдийнхөө амжиргааг улам дээшлүүлэхийн тулд ард олноороо зул өргөж байна шүү дээ, энэ Засгийн газар, түүнийг байгуулсан эрхмүүд.

Энэ бүгдээс хамгийн гоё нь өнгөрсөн Засгийг огцруулахад асар их үүрэг гүйцэтгэсэн алдарт Женкогийн эрх ашиг энэ ойн босгон дээр хөндөгдөөд эхлэв үү, яав. Нэг нөхөр баривчлагдсаны сургаар асар хурдан ил гараад ирж байгаа харагдана билээ. Хэрвээ хэвлэлийнхний ярьж хэлээд байгаа шиг энэ үйл явдал цаашаа өрнөх юм бол Ч.Сайханбилэгийн Засгийн газрын хамгийн сонирхолтой үзүүлбэр энэ байна гэдэгт огтхон ч эргэлзэх юм алга. Мөн өнгөрсөн нэг жилийн хугацаанд Ч.Сайханбилэгийн Засгийн газар хэзээ мөдгүй огцрох мөнхийн хүлээлтэд оршиж ирлээ гэх байна. Одоо ч ялгаагүй. Наад зах нь түүний танхимын гишүүдээс нэрийг нь тогтоож, зүсийг нь мэдэх хүн тун цөөхөн байна. Аргагүй шүү дээ. Амьжиргаа дээшилж, асуудлуудыг шийдээгүй болохоор хурдхан огцроосой гэсэн яриатай хүн л хаа сайгүй таарах болсон байна. Огцруулсан нөхдүүд болоод оронд нь гарч ирсэн Шийдлийн гэх Засгийн газрын нэг жилийн ойг манай ард түмэн  нэг иймэрхүү л дүр зурагтай угтаж байна даа.