Улстөрийн хөлгөн дээрхи шатрын өрөг хоромхон зуур өөрчлөгдөж магадгүй дүр зураг нэгэнт өрнөлөө. Гоё байна. МАХН-ын ахмадууд Н.Энхбаяртайгаа нийлээч ээ хэмээн МАН-ын даргад хандаж байх зуур, энэ намын гишүүн сайдыг АТГ-ынхан авлахаар отож байжээ. Цаг хугацааны давхцалаа гэж. Ингэхэд энэ хөгшчүүлийг Н.Энхбаяр хуучин намынхаа зүг илгээсэн тухай яриа байна билээ. Магадгүй. Өршөөлийн хууль Н.Энхбаярын мөрөөдлийг нэг талд нь багтаасан тул тэрбээр улстөрийн тавцан дээр дахин зогсох ойрын ирээдүй нь ямартай ч хаагдсан юм. Тэгээд ч түүний МАХН сүүлийн үед нэг л биш болоод байгааг тэр анзаарсан байлгүй дээ.

Ерөнхийдөө Н.Энхбаяр ний нуугүй хэлэхэд эдүгээ нүхгүй хулгана шиг л болсон гэсэн үг. Нүхгүй болсон хулгана гулзуурдаг. Н.Энхбаяр галзууръя гэхээр АТГ шүүрээд савандаа түгжчихнэ. Тэгэхээр галзуурахгүй гээд намаа хаян Солонгос руугаа зугатаалтай биш. Дээр нь Г.Шийлэгдамбын нь байж байгаа царай. Ёстой л сааль сүүний цагаар үнээ малаа хаяаад үхчихлээ гээд талийгаач эхнэрээ хараасан нөхрийн тухай шог яриа шиг л юм болжээ. Ер нь түүний талаар газар тойрсон баахан яриа дээгүүр, доогуур тэнүүчлээд байхад л мань эр дэндүү улстөржөөд явчихсан нь “Ингэх гээд байсан юм” гэдэг киноны үйл явдалтай тун адилхан харагдах болжээ.

Г.Шийлэгдамбын асуудал үнэн болж эргэвэл энэ нам тэгсхийгээд “жамаараа халих” шинжиндээ орох байх. Өөр яах вэ дээ. Үүнийг ч мэдрэхдээ Н.Энхбаяр хуучин намынхаа зүг “элчүүдээ” илгээсэн байж болох талтай. Энэ нь түүний эцсийн найдвар, сүүлийн хоргодох байр яах аргагүй мөн. Мөн МАН-д ороод Н.Энхбаяр нар өөд үзэхгүй нь тодорхой ч шорон гяндангаас айхгүй суух сайн тал бий. МАН-ынхан ч өнгөрсөн сонгуульд түүний хорлосон явдлыг мартана гэж байхгүй дээ.

Мөн МАН-ын дарга ч хөгшчүүдээр сүй тавиулсан байх магадлал бага ч гэсэн бий. Холыг харсан бол МАХН-ынхан буцаж ирсэнээр ирэх сонгуульд олонхи биш юм аа гэхэд олон суудалтай намаар тодорч, засгийн жолоон дээр дахин залрах дархан эрх түүнд ногдоно гэдгийгээ хашир хандгай юу андахав.

“Женкогийн” хүн гэгдэх Б.Батзаяатай залгуулаад дээрхи нөхрийг баривчилсан явдалд олон нийт нэг их цочирдон гайхахгүй байна. Гэхдээ очих газарт чухам аль нь хүргэхийг үл мэдэх салаа замын бэлчир дээр ирсэн мэт гайхасхийгээд, өвөр хоорондоо янз бүрийн таамаг дэвшүүлсэн шиг сууцгааж байгаа ч манай зарим нэг мэргэн түргэн хүмүүс дараа нь яах тухай барин тавин ярих болов. Тэр ч бүү хэл одоо хэн гуай баригдана гэсэн яриа ч тодорхой хэмжээнд түгээд буй. Гэтэл нэгэн мэргэч төлөгч дуу шуутай нөхдүүд чимээгүй болоод ирэхээр л тэдэнтэй ямар нэг юм заавал болдог хэмээн жиргэжээ.

Үнэгүй бяслаг зөвхөн оготны хавханд л байдгийг Г.Шийлэг сайд үнэхээр мэдээгүй явсан бол түүний хохь болно. Үнэнч нөхдийн нь мэдэгдээд буй шиг хэлмэгдсэн бол тэрбээр баатар болно. Одоо түүнд ийм л хоёр зам үлджээ.

Магадгүй юм. “Женко” уг нь төмөр зам, Тавантолгой энэ тэр гээд тун их үзэлцдэг байснаа гэв гэнэт таг болчихсон тал бий. Хурал дээрээ ч тоотойхон харагддаг болсон юмдаг. Энэ ер нь яагаад дуугарахаа болив оо гээ л хэрэгт дуртайчуудын клубынхэн гайхацгаадаг байв. Гэтэл Б.Батзаяа гэгч нөхөр баригдаадахлаа. “Женко” ч гараад ирэв.  

Н.Энхбаяр бас байгаа үгүй нь мэдэгдэхээ байсан юм. Г.Шийлэгдамба ч нэг хэсэгтээ зурагтын дэлгэцнээс салдаггүй байснаа гэнэт гарахааа больсон. Хэрэгт дуртайчуудын клубынхэн ч асууж сураглаад л. Тэгээд л эцсийн дүн нь өчигдрийн үйл явдал. Үнэгүй бяслаг зөвхөн оготны хавханд л байдгийг Г.Шийлэг сайд үнэхээр мэдээгүй явсан бол түүний хохь болно. Үнэнч нөхдийн нь мэдэгдээд буй шиг хэлмэгдсэн бол тэрбээр баатар болно. Одоо түүнд ийм л хоёр зам үлджээ.

Бас нэг залуу лидерийн хувьд нээрээ л бас таг болоод байгаа нь үнэн. Зодоон хийснийхээ дараа Солонгост хэсэг амьдарсан. Саяхан Германд байгаа чимээ дуулдаад эх орондоо ирсэн сурагтай байна билээ. Ер нь л наранд цохиулахаас айсан хүүхэд шиг огтхон ч ил гарахгүй байгаа нь үнэн. Хэрвээ тэр нэгэн мэргэч үнэн хэлсэн бол таг чимээгүй болсноороо дараагийн хүн нь хэн гуай байхыг нээрээ үгүйсгэх юм алга. Яагаад гэхээр томчуудын тоглоом хатуу.

Ямар ч өөрчлөлт орохгүй хэмээн АН-ын нэгэн нэлээд хэнэггүйхэн, гэхдээ элдэв эх сурвалжид тун ойрын нэгэн үгүйлж байна. Эрхэм гишүүн Г.Уянга энэ Засгийн газрыг огцруулахгүй бол бараг л амиа хорлоно гээд байсан сураггүй байгаа биз хэмээгээд тачигнатал инээж байна. Тэгвэл сайдыг барьсан, З.Баянсэлэнгэ ууртай байгаа, Өршөөлийн хууль хүссэнээр батлагдаагүй гээд “Шударга ёсныхон” Засгаас гараад явчихвал энэ танхим тарах юм биш үү гэтэл мөн л баахан инээлээ. Энэхүү инээмтгий хүнийхээр бол энэ эвсэл гараад явлаа гэхэд ИЗН, МҮАН энэ тэртэй цаашаа юу ч болоогүй юм шиг хамтраад явчих нөхцөл бий гэнэ. Тэр ч бүү хэл бие даагчдыг урьсан ч яадаг юм гэж байв. Тиймээс үйл явдал цаашаа хэрхэн өрнөхийг хараад л хэвтэцгээж байхаас.

Д.Гал