“Женко” Баттулга өөрийн нь хүнийг хуулийнхан аваачаад авдрандаа түгжчихсэний дараа гэв гэнэт хаанаас ч юм гарч ирээд яаран сандран мэдэгдэл хийв. Хэвлэл мэдээллийн хэрэгсэлүүд ч энэ Засгийн газар унах тал руугаа нэгэнт хазайлаа даа хэмээн шаагилдаж гарлаа. Энэ бүхэнтэй зэрэгцээд Засгийн ордонд ч хөл хөдөлгөөн ихсээд явчихав. Аргагүй шүү дээ, алдарт “Женко” Засгийг унагаана гээд нэг л зуух юм бол санасандаа хүрдэг гэдгийг хэвлэлийн аваргууд сайн мэднэ шүү дээ. “Шинэтгэлийн” Засгийг яалаа даа. Хэдхэн хоногийн дотор л хэнээтэй хэсэгхэн хүнийг босгоод л самраад хаясан шүү дээ.

Ийм нэг онигоо байдаг даа. Нэг чөтгөр сууж байгаа ламын хажуугаар өнгөрсөн чинь нөгөөх нь амандаа, “Ум ма ни бад ми хум” гээд уншчихдаг шүү дээ. Тэгтэл нөгөө чөтгөр, “Зүгээр байхад зүгээр л байгаарай” гэсэн тухай. “Женкогийн” хувьд үүнтэй тун адилхан юм болж байх шив дээ.

АН-ын дарга З.Энхболд МАН-ын дарга амьдаатайгаа хавсайдахгүй бол хүчин мөхөсдөж магадгүй гэж үзсэн үү, яасан тэрбээр М.Энхболдын өрөөнд энэ орой тун удаанаар морилоод гарч ирэхдээ хөлчүүрхсэн байсан гэх.

Өнгөрсөн дөрөвний орой Засгийн ордон урьд урьдынхаасаа их хөл хөдөлгөөнтэй байлаа. Хөлчүүхэн нөхдүүд ч нэлээд харагдлаа. Ер нь манай дэээдэс тэр жил олимпийн аварга төрөхөд хөл дээрээ тогтож чадахгүй ордноосоо гарч ирснээс хойш энэ газар  хэн нэгэн хааяа халамцуу явах  асуудал хамаа намаагаа алдсан л даа. Ямар сайндаа УИХ-ын гишүүд нь хуралдаа согтуу ирчихээд даргаараа “Харьж унт” гээд гуйлгаж суух вэ дээ.

Тэгвэл энэ дөрөвний орой эрхэм дээдэс зүгээр ч нэг бие биенийхээрээ орж гарсангүй. Ерөнхийдөө энэ өдөр “Шийдлийн” гэх нэртэй Засгийн газрын цаашдын хувь заяа шийдэгдэж байсан гэвэл зохилтой. Яагаад гэхээр “Шинэтгэлийн” Засгийг унагааж, АН-ын даргын суудлыг авах З.Энхболдын алсын төлөвлөгөөг хэрэгжүүлэхэд түүний “Шонхор” фракцаас илүүтэйгээр “Женко”-гийн МоАХ фракцийнхан голлох үүрэг гүйцэтгэсэн шүү дээ. Тиймээс энэ өдөр эрхэм “Женко” өрөө төлөхийг АН-ын даргадаа тулгасан сураг байна.

УИХ болоод АН-ын дарга З.Энхболдын хувьд “Женко”-гийн хүмүүсийг хамгаалснаар өрнөөсөө гарна гэдэг хэнд ч тодорхой. Мөн энэ өрөө төлөхөд сөрөг хүчин болох МАН-ын дарга амьдаатайгаа хавсайдахгүй бол хүчин мөхөсдөж магадгүй гэж үзсэн үү, яасан тэрбээр М.Энхболдын өрөөнд энэ орой тун удаанаар морилоод гарч ирэхдээ хөлчүүрхсэн байсан гэх.

Ингэхэд З.Энхболдын хувьд “Женкод” өрөө төлөх ганцхан зам бий. Тэр нь энэ Засгийг унагаад өөрөө Ерөнхий сайд болох. Ингэснээр цагдаа, хүчний байгууллагыг гартаа бүрэн атгах явдал. Тэгсэн цагт “Женкогийн” өрийг төлөх нь байтугай өөр юу ч хийсэн болох стратегийн уудам түүний өмнө цэлийх болно. Харин энэ цаг үе дор эрхэм “Женко” Засаг хэмээх бөхийг богино хугацаанд унагаадаг дархан мэхээ хийхээр зэхэж байна. Тэр нь өдгөө Засгийг унагаах саналд гарын үсгээ зураад байгаа 17 хүн дээр МоАХ фракцийн хоёр сайдыг нэмээд шууд хөнтрөх мэх. Тэр ч бүү хэл энэхүү уран мэхнийхээ талаар амралтын өдрүүдэд Улаанбаатарын ойролцоо буйдхан газар эцэслэн шийдэж, 17 болоод байгаа гарын үсэгт 2 сайдаараа гарын үсэг зуруулж гүйцээсэн гэх сураг тэр зүгээс тун олонтаа сонсогдох болжээ.

Энэ нь ч ортой байж болох үгийг Х.Баттулга өчигдөр АН-ын бүлгийн хурал дээр хэлсэн байна. Тодруулбал, АН-ын бүлгийн хурлаар Үндсэн хуулийн талаар хэлэлцэх үед “Засаг чинь огцорчихоод байхад юун Үндсэн хууль вэ” хэмээн хэлсэн нь “Шийдлийн” Засгийн газрыг огцруулах шийдлийг Женко аль хэдий олчихсоны шинж бус уу.

Д.Гал