Энэ долоо хоногт шүүхээр шийдвэрлүүлсэн хийгээд онцлох дуулиант хэргүүдийн тоймыг хүргэж байна.

     Ц.Анандбазарын хүүг хөнөөсөн этгээдүүд анхан шатны шүүхээр дахин орно

“Сод монгол” группийн захирал Ц.Анандбазарын хүү 17 настай Ц-г хөнөөсөн этгээдүүдийн гомдлыг  Нийслэлийн давж заалдах шатны шүүх хэлэлцсэн юм. Энэ хэрэгт Д.Чулуунбаатар, Н.Батням нарын зургаан залуусыг насанд хүрээгүй байхдаа бусдын амь насыг шунахайн сэдэлтээр, онц харгис хэрцгий аргаар хөнөөсөн гэж ялласан байдаг. Тэгвэл давж заалдах шатны шүүхээс Ц.Анандбазарын хүүг хөнөөсөн Н.Батнямд оноосон цаазын ялыг хүчингүй болгох шийдвэр гаргажээ. Учир нь анхан шатны шүүхээс түүнд цаазын ял оноохдоо ямар зүйл ангийг баримтлан оноосон гэдгээ шийтгэл тогтоол дээрээ бичээгүй байна.

 
Уг үйлдлийг нь ноцтой алдаанд тооцон анхан шатны шүүхийн шийдвэрийг хүчингүй болгож, хэргийг анхан шатны шүүхээр дахин хэлэлцүүлэхээр болжээ.

 Т.Цогт, Г.Маралмаа нар Өршөөлийн хуульд хамрагдаж ялаа хасууллаа

Дөрөвхөн настай охиноо хөнөөсөн хэрэгт буруутгагдан шүүхээс ял сонссон Т.Цогт, Г.Маралмаа нар Нийслэлийн давж заалдах шатны шүүхэд гомдол гаргасан байдаг. Тэгвэл давж заалдах шатны шүүхээс 24 жилийн ял сонссон Т.Цогт, Г.Маралмаа нарын ялыг 22 жил болгож буурууллаа.

Тодруулбал, Т.Цогт, Г.Маралмаа нарыг Эрүүгийн хуулийн ерөнхий ангийн 36 дугаар зүйлийн 36.2-т заасныг журамлан Эрүүгийн хуулийн тусгай ангийн 100 дугаар зүйлийн 100.1 дэх хэсэгт зааснаар оногдуулсан ялыг Монгол улсын Өршөөлийн тухай хуулийн 4.1 дэх хэсэгт зааснаар өршөөлд хамрууллаа.

Батлан даалтад гарсан Б.Батзаяа, Ли Жон Гёл нарыг дахин хорьлоо

Зам тээврийн яамны Төрийн нарийн бичгийн дарга асан  Б.Батзаяаг шинэ төмөр замтай холбоотой хэргээр Эрүүгийн цагдаагийн газрын Эдийн засгийн гэмт хэрэгтэй тэмцэх хэлтсээс саатуулан шалгаж байгаа юм. Түүнтэй хамт Ухаахудаг-Гашуун сухайтын чиглэлийн төмөр замын ажлыг гүйцэтгэж байсан Өмнөд Солонгосын “Самсунг С&Т” компанийн захирал Ли Жон Гёлыг ч мөн шалгаж байгаа билээ. Тэднийг энэ сарын 16-ний өдөр батлан даалтанд гаргасан ч  2 сар үргэлжлүүлэн хорих шийдвэрийг прокуророос тавьсанаар эргүүлэн хориод байна.

Г.Шийлэгдамбыг 60 хонох цагдан хорихоор болов

ЭМС-ын сайд асан Г.Шийлэгдамбыг авлигын хэргээр саатуулаад байгаа. Түүнийг АТГ-аас их хэмжээний авлига авсан хэмээн Эрүүгийн хуулийн тусгай ангийн 268-д зааснаар эрүүгийн хэрэг үүсгэн шалгаж байгаа юм. Мөрдөн байцаалтын явцад түүнийг сэжигтнээр тооцож, 14 хоног цагдан хорьсон. Тэгвэл батлан даалтад гаргах эсэхийг энэ долоо хоногт шүүхээр хэлэлцэж 60 хоног цагдан хорих шийдвэрийг гаргасан юм. Г.Шийлэгдамбын хувьд эрүүл мэндийн шалтгаанаар батлан даалтад гарах хүсэлтээ өгөөд байсан билээ.

”АПУ”-гийн борлуулагчийг хөнөөсөн этгээд чанга дэглэмтэй хорих ангид 24 жил...

"АПУ"-ХХК-ийн борлуулагчийг хөнөөсөн Г.Пүрэвсүрэнд 24 жилийн хорих ял оноожээ. Баянзүрх, Сүхбаатар, Чингэлтэй дүүргийн шүүхийн 2015 оны 10 дугаар сарын 30-ны өдрийн шүүх хуралдаанаар шүүгдэгч Г.Пүрэвсүрэнд холбогдох хэргийг хянан хэлэлцээд Эрүүгийн Хуулийн Тусгай ангийн 91 дүгээр зүйлийн 91.2.1 дэх хэсэгт зааснаар 24 жилийн хорих ял оноож эдлэх ялыг чанга дэглэмтэй хорих ангид эдлүүлэхээр шийдвэрлэсэн байна.
 
Хэргийг эргэн сануулбал Баянзүрх дүүргийн 11 дүгээр хороо “Хадат Мянган” хүнсний дэлгүүрийн гадна өнгөрсөн оны  есдүгээр сарын 15-ны өдөр “Арвижих Алтан Тэвш“ ХХК-ний борлуулагч ажилтай хохирогч А-г, Г.Пүрэвсүрэн гэгч нь шунахайн сэдэлтээр /борлуулж байсан архи, пивыг нь авах зорилгоор/ гутлын үдээсээр хоолойг нь боож санаатай алсан гэмт хэрэг үйлдсэн билээ.

“Хурд” группийн барилгын ослоор дахин нэг иргэн амиа алдлаа

ХУД-ийн XV хорооны нутаг дэвсгэрт баригдаж буй 600 автомашины нийтийн зогсоолын барилгад энэ сарын 17-ны 04:00 цагийн орчимд осол болсны улмаас 54 настай, эрэгтэй М амиа алдсан тухай манай сайт өмнө нь мэдээлсэн билээ.

Барилгын дотор хогийг цэвэрлэж байхад өргөгч кранд бэхэлсэн хогтой төмөр савны оосор тасарч иргэн М-ийг цохиж гурван давхраас унагаасан байна. Албаныхны ярьснааг уг осол хөдөлмөрийн аюулгүй байдлын дүрэм журмыг ноцтой зөрчсөний улмаас болсон аж.

Уг барилгыг “Хурд” групп ахлан барьж байгаа бөгөөд туслан гүйцэтгэгчид нь “Хос бар”, “Дабл гранд” барилгын компани аж. Төв цэнгэлдэх хүрээлэнгийн баруун хойно баригдаж буй авто зогсоол 2016 оны есдүгээр сард ашиглалтад орохоор төлөвлөгдсөн байжээ.

Д.Дуулим