“Мунзуй” хочит Г.Нямдорж УИХ-ын гишүүн Н.Номтойбаярын талаар өргөдөл бичиж түүнийгээ Ёс зүйн хороо болон УИХ-ын гишүүн, УИХ-ын дарга З.Энхболдын нэр дээр хүргүүлэхээр болсон байна. Тэрбээр тус өргөдөлдөө Н.Номтойбаярын хувийн амьдрал хийгээд улс төр дэх ажил хэргийнх нь талаар бичжээ.

Мөн УИХ-ын гишүүн Н.Номтойбаярыг авлига, хүчин, танхайн болон бусад олон төрлийн гэмт хэргийг үйлдсээр байхад хууль хүчний хяналтын байгууллагууд түүний хамгаалалтын албаны ажилтнууд шиг аашилж, түүнтэй сөргөлдсөн хүн бүрийг буруутган яллаж, өөнтөглөдөг боллоо хэмээн дурьджээ. Түүнчлэн төрийн эрх барих дээд байгууллага болсон УИХ-ын гэмт хэрэгтэн орогнодог газар биш бөгөөд Н.Номтойбаярын өдүүлсэн гэмт хэргүүдэд ёс зүйн болон хуулийн хариуцлага хүлээлгэж өгөхийг миний бие хүсч байна гэжээ.

Түүнчлэн тэрбээр 22 үндэслэл бүхий баримтыг өөрөө нотолно гэсэн байна.

Дашрамд дурьдахад, УИХ-ын гишүүн Н.Номтойбаяр болон “Мунзуй” хочит Г.Нямдорж нар нь 2013 онд Төрийн ордны дэргэдэх бааранд бие, бие рүүгээ хутга барьж дайрсан гэх шуугиан дэгдэж байсан. Тухайн үед УИХ-ын гишүүн Н.Номтойбаяр “Би хүн рүү хутга барьж дайраагүй. Г.Нямдорж над руу хутга далайсан. Би түүний амьдралыг нь өөд нь татсан” гэж мэдэгдэж байсан.

Харин Г.Нямдорж нь “Н.Номтойбаяр согтуу танхайрч, увайгүй зан гаргаж хутга барьж дайрсан. МАК компани миний эсрэг зохион байгуулалттай мэдээллийг хэвлэлүүдэд мөнгө өгч цацуулсан” гэж байсан юм. Уг нь тэд нэгэн цагт найзууд хэмээн явж байсан юм.

Т.Энхэлээ