Худалдаа хөгжлийн банкны "Таван шар" тооцооны төвөөс 380-аад сая төгрөг дээрэмдсэн залуусыг Улаанбаатар хотын цагдаагийн газрын Онц хүнд гэмт хэрэгтэй тэмцэх болон Сонгинохайрхан дүүргийн Цагдаагийн хэлтсийн ажилтнууд эрэн сурвалжилж өчигдөр 09.00 цагийн үед баривчиллаа. Тэд Орхон аймгийн харьяат,  төрсөн ах дүү хоёр байсан бөгеөд хоёулаа эрхэлсэн тодорхой ажилгүй, ах Б нь 1985 онд төрсөн, дүү Э нь 1992 онд төрсөн аж.

Сэжигтэн Э нь Баянгол дүүрэг дэх “Түндэмүн”, Б нь XIII хороололд байрлах нэгэн саунд тус тусдаа бүгэж байсан гэнэ. Тэд хэрэг хийхээр бэлтгэж байхдаа цахим хуудсанд байршуулсан зарын дагуу “Дробинк" маркийн буу худалдан аваад банк дээрэмдсэнийхээ дараа гол руу шиджээ.

Түүнийг нь цагдаагийн ажилтнууд хайж байгаа юм байна. Түүнчлэн банк дээрэмдэхдээ үүдэнд нь байрлуулсан саарал өнгийн “Приус 20” маркийн машинаа XXI хорооллын орон сууцнуудын дунд орхисон байжзэ. Уг этгээдүүд банкнаас 380 орчим сая төгрөг дээрэмдсэн гэж хэвлэл мэдээллээр мэдээлсэн.

Тэгвэл албаны эх сурвалжийн өгсөн мэдээллээр нийт 424,000,000 төгрөг дээрэмдсэн бөгөөд дээрмийн гэмт хэрэг үйлдэхдээ ашигласан автомашинаас 394,000,000 төгрөг, ломбарданд тавьсан автомашинд нуусан 30,000,000 төгрөгийг хураан авч банкинд хүлээлгэн өгч хохиролгүй болгосон байна.

Э, Б нар өмнө нь найман нэрийн хүнсний дэлгүүр ажиллуулдаг байсан ч тэр нь дампуурч, их хэмжээний өрөнд орсон тул дээрэм хийсэн гэж мэдүүлж байгаа аж. Тэдэнд Эрүүгийн хуулийн 147.3-т зааснаар хэрэг үүсгэн Сонгинохайрхан дүүргийн Цагдаагийн I хэлтэст үргэлжлүүлэн шалгаж байна.

Д.Ундрах /24tsag.mn/