Тамирчин охины жинг нь хасах гэж байгаад үхэлд хүргэсэн ноцтой хэрэг өнгөрсөн гуравдугаар сард гарч байсан.

  Уг хэрэг Дундговь аймагт гарсан бөгөөд тус аймгийн жүдо бөхийн өсвөрийн аварга шалгаруулах тэмцээнд оролцох гэж байсан 13 настай охин амиа алдаж олон хүнийг цочролд оруулж байсан билээ.  Нас барсан охин болох Г сумын төвд нагац эгчийндээ амьдарч байсан.

Өдгөө зургаадугаар ангийн сурагч түүнд асран хамгаалагч болж байсан хүн нь ганцхан нагац эгч нь байсан гэдэг.

Талийгаач Г нь өнгөрсөн жилээс жүдо бөхөөр хичээллэж эхэлсэн бөгөөд маш шаргуу, хөдөлмөрч, дайчин хүүхэд байсан гэдгийг дасгалжуулагч хийгээд цуг бэлтгэл сургуулалт хийдэг нөхөд нь онцолж байлаа.

13-хан настай том зорилт тавьсан талийгаач охины хувьд жүдогоор хичээллэж эхэлсэнээсээ хойш хэд, хэдэн тэмцээнээс медаль хүртсэн байдаг. Улмаар энэ удаад жүдо бөхийн өсвөрийн улсын аварга шалгаруулах тэмцээнд оролцох зорилготойгоор бэлтгэлдээ гараад байсан ч харамсалтайгаар амиа алдсан юм.

Тус тэмцээнд оролцохоор Дундговь аймгийн 11 сумаас нийт 300 гаруй хүүхэд багачууд ирсэн байсан талаар тухайн үед албаны эх сурвалж онцолж байсан. Харин харамсалтайгаар амиа алдсан охин Эрдэнэдалай сумаас ирж бэлтгэл сургуулилтаа хийж байжээ.

 Талийгаач охин 28 кг-ын жинд барилдахаар төлөвлөсөн бөгөөд  тухайн өдрийн 14.00 цагийн орчимд жинг нь үзэхэд 29.5 кг буюу 1.5 кг-аар илүү гарсан учир бэлтгэл сургуулалт, жин хасах бэлтгэлийг эрчимжүүлсэн байдаг. Дасгалжуулагч багшийнх  нь хувьд жинг нь хасуулах зорилгоор нэлээд удаан гүйлгэж хөлөргөөд дараа нь матраасанд ороосон нь түүний аминд хүрэх гол шалтгаан болсон бололтой.

Тэгвэл дээрх хэргийн шүүх хурал болж хэрэг Өршөөлийн хуульд хамрагдаж хэрэгсэхгүй болжээ.

Энэ талаар прокурорын албаны эх сурвалж  “Дундговь аймгийн Сайнцагаан сумын төвд 2015 оны 03 дугаар  сарын 06-ны өдөр жудо бөхийн өсвөр үеийн аймгийн аварга шалгаруулах тэмцээнд оролцохоор бэлтгэл хийж байсан тус аймгийн Эрдэнэдалай сумын Ерөнхий боловсролын сургуулийн 6 дугаар ангийн сурагч Г нь жингээ хасах зорилгоор 10 кг жинтэй матрасан дор орж, 3 хүүхдээр дээрээсээ даруулж хэвтсэний улмаас ухаан алдаж, улмаар аймгийн нэгдсэн эмнэлэгт хүргэгдэж ирээд нас барсан хэрэг гарсан.

Хэргийг аймгийн прокурорын газраас хянаад, матрас дээрээс дарсан 15 настай Ө, П нарыг эрүүгийн хариуцлага хүлээх насанд хүрээгүй үндэслэлээр үйлдэл холбогдлыг нь хэрэгсэхгүй болгон шийдвэрлэж дасгалжуулагч багш Г овогтой М-д Эрүүгийн хуулийн тусгай ангийн 272 дугаар зүйлийн /албан тушаалатан албан үүрэгтээ хайнга хандсан /272.2 дахь хэсэгт зааснаар, Н овогтой М-д Эрүүгийн хуулийн тусгай ангийн 94 дүгээр зүйлийн / Бусдыг болоомжгүй алах /94.1 дэх хэсэгт зааснаар тус тус яллах дүгнэлт үйлдэж, харьяаллын дагуу Дундговь аймаг дахь Сум дундын Эрүүгийн хэргийн анхан шатны шилжүүлсэн байна.

Шүүхээс хэргийг 2015 оны 12 дугаар сарын 14-ний өдөр хянан хэлэлцээд, шүүгдэгч Г овогтой М-ийг албан үүрэгтээ хайнга хандаж бусдад хүнд хор уршиг учруулсан, шүүгдэгч Н овогтой М-ыг бусдыг болгоомжгүй алсан гэмт буруутайд тус тус тооцож, Өршөөл үзүүлэх тухай хуулийн 7 дугаар зүйлийн 7.1 дэх хэсэгт зааснаар хэргийг хэрэгсэхгүй болгож шийдвэрлэсэн” гэв.

Д.Дуулим