Татварын ерөнхий газрын дарга Б.Ариунсан албан тушаалаасаа чөлөөлөгдөж, ажлаа өгөх өргөдлөө өгсөн тухай яригдаж эхэллээ. Энэ мэдээг сонссон нэг нь эрхэм дарга ирэх сонгуулиар дахин Говь-Алтайдаа үзэхээр шийдэж дээ хэмээн тайлбарлаж байна.

Ингэхэд Ардчилсан нам засаг барих үедээ Нийгмийн даатгал юм уу, Татварын газрынхаа даргаар Б.Ариунсанг томилдог уламжлалтай гэхэд болно. Харин энэ удаа Түүнийг Тагнуулын ерөнхий газраар дамжуулаад Татварын ерөнхий газрын даргаар тавьсан нь цаанаа тун учиртай биз. Ямар ч байсан тагнуул нь ч товчлоод бичихээр ТЕ, татвар нь ч ТЕГ гэдгийг л лав харгалзаж үзээгүй байх. Гэхдээ мань нөхрөөр хэн хаанаа юу хийж явдагийг, хэрхэн яаж татвар энэ тэрээ бултуулдагийг эхлээд тагнуулдуулсан байж болно шүү дээ. Тэгээд эдийн засгийн энэхүү хүндрэлтэй үед Татварынхаа даргаар тавьсныг огтхон ч үгүйсгэхгүй байна. Яагаад гэхээр энэ жилийн хувьд татварын төлөвлөгөөний биелэлт бараг 100 шахам хувьтай яваа гээд Сангийн яамныхан бөөн баяр байна билээ. Түүнээс гадна үйлдвэрлэгчид болон татвар төлөгчид энэ эрхмийг өнгөрсөн хугацаанд татвартай холбоо бүхий хэд хэдэн хууль боловсруулахад оролцож, баялаг бүтээгчдийнхээ талд муугүй ажилласан хэмээн үздэг юм байна.

Тэрбээр Өршөөлийн, Ил тодын хуулийг батлуулахад өөр намынхантайгаа битгий хэл журмын нөхөдтэйгээ хүртэл энгэр заамандаа хүрч байсан гэлцдэг юм. Ямар ч байсан Ил тодын хууль батлагдаад хэрэгжиж эхэлсэн энэ 50 хоногт л гэхэд нууц байсан 4,0 их наяд төгрөг ил болсон тухай зурагтаар ярьж байсан. Мөн татварын хуулинд орох гол өөрчлөлтүүдийн талаар олон зүйл ярьж байснаа орхиод ажлаа өгөх болсонд баялаг бүтээгчид нэлээд харамсаж байгаа бололтой байна билээ. Гэхдээ Намын дарга болоод Ерөнхий сайд нь түүний өргөдөлд “ногоон гэрэл” асаах, эсэхийг эдүгээ таамаглахад арай л эрт байна.