Сонгинохайрхан дүүргийн 32 дугаар хорооны нутаг дэвсгэрт үйл ажиллагаа явуулдаг “Гранд повер” ХХК-ийн Нүүрсний хийн үйлдвэрт энэ сарын 19-нд осол гарч, гурван хүн амиа алдаж, найман хүн хордсон  ноцтой хэрэг гарсан байна.

Эх сурвалжийн мэдээлж байгаагаар нүүрснээс хүхэр гаргаж авах үед гэнэт хий алдагдсан байна.

Нийслэлийн Онцгой байдлын газрын Аврах ангийн алба хаагчдыг ослын газарт очиход 39 настай Ө, 24 настай Б, 23 настай Л нар амиа алдсан байсан бөгөөд тэдний цогцсыг гарган, цагдаагийн алба хаагчдад хүлээлгэн өгсөн байна. Харин хордсон найман ажилтанг Хордлогын яаралтай тусламжийн Үндэсний төв рүү хүргэжээ.

        Хий алдагдах үед амиа алдсан гурван ажилтан Нүүрс боловсруулах химийн үйлдвэрийн худагт ажиллаж байсан гэх мэдээлэл байна. Эл хэрэгтэй холбогдуулан Мэргэжлийн хяналтын Ерөнхий газраас осол гарсан үйлдвэрийн үйл ажиллагааг тодорхойгүй хугацаагаар зогсоожээ.

Энэ талаар ЦЕГ-ын албаны хүнээс тодруулахад "Ийм хэрэг гарсан нь үнэн. Тодруулбал,  СХД-ийн 32-р хороо “Grand Power” үйлдвэрт хүн угаартаж нас барсан байна” гэсэн мэдээллийг 12-р сарын 18-нд өдөр цагдаагийн байгууллагад өгсөн. Дуудлагын дагуу очиж  шалгахад, тус үйлдвэрийн “Хий дамжуулах хоолойн худаг”-т засварлах ажлаар орсон гагнуурчин БЗД-ийн 14-р хороонд оршин суух 39 настай эрэгтэй Ө , инженер Өвөрхангай аймаг Бат-Өлзий суманд суух 23 настай эрэгтэй Л , нярав Сэлэнгэ аймаг Мандал суманд суух 24 настай эрэгтэй  Б  нар ил харагдах гэмтэл шархгүй хордож угаартсан байдалтай нас барсан байсан. Уг байранд НОБГ-ын ЭХАС-ын баг ажиллаж цогцоснуудыг гаргаж 8 хүнийг аварч ЯТТ-ын 103-т хүлээлгэн өгч эмнэлэгт хүргэсэн. Хэргийг  СХД-ийн цагдаагийн нэгдүгээр хэлтэс  шалгаж байна.  Тус обьектийг НМХГазар, НОБГ-аас шалгахад агаарт H2S 16%, органик уур 64% “Аюултай нөхцөл” үүсэн тул Хэв журмын хамгаалалтанд авсан" гэлээ.

Энэ талаар эргэн мэдээлнэ.

Д.Ундрах /24tsag.mn/