Ардчилсан эмэгтэйчүүдийн холбооны дөрөвдүгээр дээд чуулган Төрийн ордонд болж, холбооны тэргүүнийг сонгох санал хураалт явагдлаа.

Ардчилсан эмэгтэйчүүдийн холбооны тэргүүнд 10 нэр дэвшигч өрсөлдөх эрхийн батламжаа гарсан ч өнөөдрийн чуулганы явцад холбооныхоо тэргүүнд нэр дэвшсэн гишүүдийн зургаа нь нэрээ татаж дөрвөн гишүүн өрсөлдөж буй юм.

Санал хураалтаар:

С.Одонтуяа 319 санал

 Б.Ургамалцэцэг 306 санал

И.Нарантуяа 19 санал

 Г.Хажидмаа 6 санал тус тус авсан байна.

Дахин санал хураалт явагдахаас өмнө И.Нарантуяа, Г.Хажидмаа хоёр нэрээ татжээ. Харин С.Одонтуяа гишүүн “Ялсан байтал дахин тооллого гээд бантагнуулах юмаа” хэмээн жиргэсэн байна.

Энэ талаар АН-ын гишүүдээс тодруулахад “Нэр дэвшигчийн хэн нэгнийх нь авсан санал 50 %-д хүрээгүй бол дахин санал хураах ёстой. Энэ бол манай намын дүрэм. Дүрмээ зөрчих ёсгүй. С.Одонтуяагийн санал 50 %-д хүрээгүй учраас ялсан гэж тооцохгүй. Үүнийг өөрөө ч мэдэж байгаа. Өөрийгөө ялчихлаа гэж хүмүүсийг төөрөгдүүлсэн зүйл олон нийтийн сүлжээгээр цацаж байгаа нь зохисгүй үйлдэл юм” гэв.

Өөрөөр хэлбэл өрсөлдөгчдийн санал 50 %-д хүрээгүй учир дахин санал хурааж байгаа аж.