Ашигт малтмалын газар өнгөрсөн сард дөрвөн мэргэжилтнээ ажлаас нь халсан талаар өнөөдрийн хэвлэлүүд онцолж байна. Ашигт малтмалын лиценз бичигч Ч.Золзаяа, Зураг зүйн мэргэжилтэн Д.Мягмарсүрэн, Мониторинг судалгааны хэлтсийн мэргэжилтэн Б.Болормаа, Б.Отгонбаатар нарыг ажлаас нь халсан шалтгаан томоохон асуудал дагуулж эхлэх шинжтэй байгаа юм.

 Тэднийг “Дарга нарынхаа хууль бус үйлдлийг санамсаргүй байдлаар мэдчихсэн болохоор ажлаасаа халагджээ" гэх бор шувуу нисч байна. Эх сурвалжийн хэлж буйгаар эл дөрвөн алба хаагчийн ажлаасаа халагдсан шалтгаан нь уул уурхайн хайгуулын лицензтэй холбоотой гэнэ.

Тодруулбал, АМГ-ын Кадастрын хэлтсийн дарга А.Чинбаатар гэгч хууль бус шийдвэр гаргаж уул уурхайн компанид хайгуулын лиценз олгосон гэдгийг мэдсэн дөрвөн алба хаагч ажлаасаа халагдсан гэх мэдээлэл байгаа юм.

 Эл асуудалд АМГ-ын дарга Д.Үүрийнтуяа ч холбогдсон байна. Учир нь дээрх хүмүүсийг ажлаас халах тушаалыг гаргажээ.

Ажилчдынх нь ярьж буйгаар Ашигт малтмалын газрын дарга нар сүүлийн үед ажилтнуудтайгаа доромжидсон, дээрэлхүү өнгө аясаар харилцдаг болоод зогсохгүй байнга л ажлаас чинь хална гэж айлгадаг болжээ. Энэ мэт маш олон хууль бус үйлдэл АМГ-т байгаа гэдгийг эх сурвалж мэдээллээ.

Энэ талаар эргэн мэдээлнэ.

Д.Дуулим