Төв аймгийн Баянчандмань суманд олныг сэрдхийлгэсэн жигшүүрт хэрэг өнгөрсөн есдүгээр сарын 24-нд гарсан тухай өмнө нь бид мэдээлсэн. Тодруулбал, Баянчандмань сумын Засаг даргын орлогч Б.Ханбаатар хамт ажилладаг 24 настай Б гэх бүсгүйг зэрлэгээр зодож, хүчирхийлсэн билээ. Бүсгүйн бие одоо ч хүнд байгаа бөгөөд яаралтай давсаг шилжүүлэн суулгах хагалгаанд орохоор эмчлүүлж байгаа юм. Түүнд иргэд болон УИХ дахь эмэгтэй гишүүд тусламж үзүүлж байгаа билээ. 

Харин сэжигтэн Б.Ханбаатар цагдан хорих төвд хоригдож байна. Тэгвэл хохирогч бүсгүйг хуралтай байхад нь "Малын гоц халдварт өвчин гарсан тул хурдхан ир" хэмээн худал хэлэн дуудаж гаргаж ирсэн гэх Баянчандмань сумын Засаг даргын тамгын газрын дарга Г.Ариунболдыг буцаан албан тушаалд нь томилсон байна. Үүнийг УИХ дахь зарим эмэгтэй гишүүд эсэргүүцэж байгаагаа өөрийн цахим хуудсаар дамжуулан илэрхийлжээ. 

Тухайлбал, УИХ-ын гишүүн Л.Эрдэнэчимэг "Г.Ариунболд ял авах ёстой. Бид цагдаа болон Төрийн албаны зөвлөлд хандана" хэмээн жиргэсэн байна. 

Түүнийг уг хэргийн гэрч хэмээн хуулийн байгууллагаас үзсэн учир тэрбээр чөлөөтэй ажлаа хийж байгаа аж. Харин хохирогчийн ар гэрийнхэн Г.Ариунболдыг буруутган "Б.Ариунболд гэгч нөхөр л миний охиныг зүгээр ажлаа хийж байхад нь дахин дахин худлаа хэлж, дуудсаар байгаад гэмт этгээдийн гарт авчирч өгсөн. Хэрэв тэр дуудаагүй байсан бол ийм хэрэг гарахгүй байсан байх. Эх хүний хувьд үнэхээр гомдолтой байна. Тэр хүн ямар нэгэн санаа зорилго агуулан худал хэлж, охиныг минь дуудсан нь илт" хэмээн мэдэгдсэн билээ. 

Хэрэг гардаг өдөр Г.Ариунболд, бүсгүйг худал хэлэн дуудаж хөдөө авчирсаны дараа Б.Ханбаатар нь хэргийг үйлдсэн байдаг. 

Т.Энхэлээ