Хууль зүйн яамны Төрийн нарийн бичгийн дарга Ж.Баярцэцэг Бүгд Найрамдах Итали Улсын  Ром хотноо 2016 оны 2 дугаар сарын 22-наас 23-ны өдрүүдэд “Цаазын ялгүй дэлхий” сэдэвт Хууль зүйн сайд нарын олон улсын 9 дүгээр бага хуралд оролцлоо. Энэ удаагийн хуралд 30-аад орны хууль зүйн сайд,  төрийн нарийн бичгийн дарга нар оролцож байгаа юм. Монгол Улс 2012 оны 1 дүгээр сарын 5-ны өдөр Иргэний болон улс төрийн эрхийн олон улсын пактын цаазаар авах ялыг халахад чиглэсэн нэмэлт хоёр дугаар протоколд нэгдэн орж, 2015 оны 12 дугаар сарын 3-ны өдөр Эрүүгийн  хуулийн шинэчилсэн  найруулгыг  баталсан билээ. Төрийн нарийн бичгийн дарга уг хурлын нээлтэнд Монгол Улсын Ерөнхийлөгч Ц.Элбэгдоржийн илгээлтийг танилцуулж, Монгол Улс цаазаар авах ялыг халсан тухай туршлага хуваалцаж, хурлын төлөөлөгч нартай санал солилцов. Хурлын үеэр Төрийн нарийн бичгийн дарга Ж. Баярцэцэг Бүгд Найрамдах Итали Улсын  Ерөнхийлөгч Сержо Маттареллад бараалхав.