Төв аймгийн Баянчандмань суманд олныг сэрдхийлгэсэн жигшүүрт хэрэг өнгөрсөн есдүгээр сарын 24-нд гарсан тухай өмнө нь бид мэдээлсэн. Тодруулбал, Баянчандмань сумын Засаг даргын орлогч Б.Ханбаатар хамт ажилладаг 24 настай Б гэх бүсгүйг зэрлэгээр зодож, хүчирхийлсэн билээ. Бүсгүйн бие одоо ч хүнд байгаа бөгөөд яаралтай давсаг шилжүүлэн суулгах хагалгаанд орохоор эмчлүүлж байгаа юм. Түүнд иргэд болон УИХ дахь эмэгтэй гишүүд тусламж үзүүлж байгаа билээ. 

Харин сэжигтэн Б.Ханбаатар цагдан хорих төвд хоригдож байна. Тэгвэл хохирогч бүсгүйг хуралтай байхад нь "Малын гоц халдварт өвчин гарсан тул хурдхан ир" хэмээн худал хэлэн дуудаж гаргаж ирсэн гэх Баянчандмань сумын Засаг даргын тамгын газрын дарга Г.Ариунболдыг буцаан албан тушаалд нь томилсон нь олон хүний эсэргүүцэлтэй тулгараад байгаа юм.

Тухайлбал, энэ талаар  УИХ-ын гишүүн Ц.Оюунгэрэл, Л.Эрдэнэчимэг нар Төрийн албаны зөвлөлд хандана гэдгээ мэдэгдсэн. Эмэгтэй гишүүдийн байр суурийг Г.Ариунболдын өмгөөлөгч хүлээн зөвшөөрөхгүй гэдгээ мэдэгдэж, шүүхэд хандахаар болсон ч тэрбээр өнгөрсөн долоо хоногт ажлаасаа чөлөө авах хүсэлтээ өгсөн талаар тус сумын Засаг дарга Б.Баярнэмэх мэдээлжээ.