SWEETYMOTION хамтлагийн гишүүн, VTV телевизийн Гүйцэтгэх захирал Энхгарамгайн ГАНБОЛОР

Он цаг, орон зай, хувь заяа... гайхалтай эрч хүч, залуу насыг мэдрүүлсэн яг л энэ дуу шиг бидний амьдрал, цаг хугацаа зогсолтгүй үргэлжилсээр. Өдөр ирэх тусам зорилго, тэмүүлэл, хөгжил, дэвшил хүн бүрийн амьдралыг өөрчилсөөр. Охидын хамтлагийн нэгэн гишүүн, гоо үзэсгэлэн, эелдэг даруу төрхөөрөө олонд танигдсан нэгэн бүсгүй өнөөдөр хэдийнээ удирдагч эмэгтэй болжээ. Энэ бол Sweetymotion хамтлагийн гишүүн, дуучин VTV телевизийн Гүйцэтгэх захирал Э.Ганболор. Түүнтэй сэтгүүлийн маань хуудсаар уншигч та олонтаа уулзаж байсан ч, энэ удаад түүний ертөнцийг огт өөрөөр таны өмнө нээж байна. Дугаарын зочин буланд тавтай морилно уу.   

TV ZONE: Урилгыг маань хүлээн авсанд баярлалаа, урин хаврын мэнд хүргэе! 

Э.Ганболор: Баярлалаа, нээрэн хавар болоод сэтгэл санаа сайхан байна шүү. Хаврын мэнд хүргэе. Миний хувьд хамтлагийнхаа ажлыг жаахан хойш тавьж, уран бүтээлийн ярилцлага өгөх, зураг авалт гээд олон ажлаас төсөөрсөн байна шүү /инээв/. Намайг урьсанд маш их баярлалаа. Уран бүтээлээ ид хийж байсан, гоё үедээ TV ZONE сэтгүүлээрээ дамжуулж уншигчидтайгаа олон удаа уулзаж байжээ.   

TV ZONE: Энэ удаад дуучин бас телевизийн дарга Ганболор миний өмнө сууж байна. Ихэнх телевизийн удирдлагад тухайн салбарт ажиллаж байсан хүмүүс байдаг л даа. Дуучин Ганболор телевизийн захирлын саналыг хэрхэн хүлээж авсан талаар уншигчдад маань сонирхолтой байгаа болов уу?  

Э.Ганболор: Хэдийгээр би өөрөө телевизийн хүн биш ч миний ард байгаа баг маань 100% телевизийн мэргэшсэн баг л даа. Би камер барьж, гэрлийг нь тавиагүй, найруулгад нь оролцоогүй. Телевизийн гүйцэтгэх захирлын ажлаа аваад, танилцаад явж байх хугацаанд хамт олонтойгоо ажиллах, хамт олныхоо өмнөөс төлөөлж ажиллах зэрэг менежерийн маш том ажил байдаг юм байна гэдгийг харж байна. Уран бүтээлчдийнхээ ажлыг хүнд хүргэх, чиглүүлэх, бизнесийн хэллэгээр бол яаж үнэ хүргэх зэрэг цэвэр зохион байгуулалт, удирдлагын ажлыг хийж байна.

TV ZONE: Телевизийн салбарт өрсөлдөөн ихтэй, үүнийгээ дагаад цэвэр болон бохир тоглогчдоороо ч ялгарч байна. Телевизийн салбарт орох саналыг хэрхэн хүлээж авсан бэ?

Э.Ганболор: Санал хүлээж аваад сар гаруй бодсон. Учир нь телевизийн ажил гэдэг нэг уран бүтээлчтэй дуэт дуулаад болих цаг хугацаанаас хамааралтай ажил биш. Телевиз гэдэг бол байнгын үзэгчтэй, үзэгчид бидний нэвтрүүлгүүдээс мэдээлэл, ойлголт авч байдаг болохоор асар өндөр хариуцлагатай ажил. Бид телевизүүдтэй байнга холбоотой ажилладаг болохоор зах зухыг нь бол ойлгодог байсан. Маш олон хүнтэй уулзаж зөвлөгөө авсаны дараа яагаад энэ шийдвэрийг гаргасан бэ гэхээр хүний амьдрал тодорхой мөчлөг, давтамжтайгаар үргэлжилж байдаг. Миний хувьд энэ том өөрчлөлтийн мөчлөгийг мэдэрч, тэр нь энэ ажил байсан юм байна гэж ойлгосон. Ажлаа аваад нэг жил болох гэж байна л даа. Би гаргасан шийдвэртээ маш их баяртай байгаа. Насаараа 4-5 хүнтэй баг хамт олон болж дуулах зорилгодоо үнэнч явж ирсэн. Түүнээс биш удаан хугацаанд олон хүнтэй хамт ажиллаж үзээгүй. Одоо 40-50 хүнтэй нэг баг хамт олон болоод ажиллана гэдэг яг л нэг адал явдалтай олон ангит кинонд орчихсон юм шиг л тийм сонирхолтой сайхан байна /инээв/. Хийж бүтээсэн,  хийх гэж байгаа юмныхаа төлөө бүгд цугтаа байна гэдэг асар их аз жаргал байдаг юм байна. Телевизийн хувьд бид үйлдвэрлэгч байя гэсэн бодлогыг барьж ажиллаж байна. Манай залуучууд өөрсдөө маш сайн суралцаж, хэнтэй ч өрсөлдөхөд бэлэн болчих юм бол зөвхөн өөрсдөө ч биш бусад телевизүүд, нэмэлт IPTV олон суваг дамжуулалтын хувилбарууд гарч ирээд л байна, тэдэнд контент нийлүүлнэ. Дэлхийн аль ч өнцөгт хийгдсэн контентууд орчуулгатай л бол хаана ч гарч байна. Тэгэхээр бид эхлээд өөрсдөө хөгжих ёстой юм байна. Гадны улс орнуудаас нэвтрүүлэг контент авахгүйгээр өөрсдөө юмаа хийж сурах ёстой. Монгол кино, монгол нэвтрүүлгүүдийн хийцийг өөрсдөө аваад монголчууд бид өөрсдөө хийх ёстой юм гэдгийг зорилго болгож байгаа. Эхнийх нь чанартай, чанаргүй янз бүр гарах байх, яваандаа бид сурна шүү дээ. УГЗ хөгжмийн зохиолч Л.Балхжав ах надад “Болороо миний дүү ер нь бол их гоё ажил шүү дээ. Дор хаяж 3 жил ажиллаж байж, хамгийн анхны үр дүн чинь мэдрэгдэнэ. Үнэхээр үр дүнгээ мэдье гэвэл 5 жил ажилла. За тэгээд 5 жилийн дараа эргээд харахад гармаар санагддаггүй л юм даа” гээд инээж байсан. Тэр үед би сонирхож ороод, болохгүй бол гарах ажил яавч биш юм байна гэдгийг маш сайн ухаарсан.

TV ZONE: Хэдийгээр хямралын үе ч гэлээ шинэ телевизүүд байгуулагдсаар байна. Та бүхэн тэсч үлдэх, цаашлаад манлайлагчийн байр сууринд очихын тулд юу хийх вэ?    

Э.Ганболор: Олон телевиз байгаагийн шалтгаан нь анхнаасаа баримталсан зохицуулалт байхгүй, төлөвлөгөөгүйгээр явж ирснээс болсон юм билээ. Байх ёстой нь байх ёстой, байгаа нь сайн байх ёстой гэсэн үүднээс баталсан журмууд нь цэгцрээд ирэхээр сүүлийн 2 жил маш олон телевиз хасагдсан. Оюуны өмчийн шаардлага, гадныхны хяналт ороод ирэхээр нэлээд цэгцэрнэ гэсэн дүр зураг харагдаж байгаа талаар ярьж байна. Манай телевизийн хувьд эдийн засгийн энэ хямралтай үед тэсч үлдэхээс гадна, манлайлагчдын байр сууринд очихын тулд өөрсдөө үйлдвэрлэгч байж, хамт олон маань сайн нэгдэж чадсанаараа цаашид хөгжих бат бөх сууриа бэлдэж байна гэж харж байгаа. Монголчууд бидний үндэсний үйлдвэрлэлээ дэмжих хандлага илт сэргэж байгаа энэ үед манай телевизийн хувьд олзуурхууштай сайхан хандлага болж байна. Монголчууд өөрсдөө бүх юмаа хийгээд, үндэснийхээ өв соёл, монгол хэл соёл, монгол мөрөөдөл, байгалиа харуулсан чанартай уран бүтээлээ хийгээд явж байхад манай үзэгчид биднийг үзнэ гэсэн маш том горьдлого байна. Монголчууд маань биднийг дэмжиж үзэхэд нь бид маш сайн контентууд хийсэн байх ёстой, тэгснээр үзэгчдийнхээ массыг нэмэгдүүлнэ.

TV ZONE: “All or nothing” шоу нэвтрүүлэг онцлууштай санагдсан? 

Э.Ганболор: Дэлхийн алдартай уран бүтээлчид өөрсдийн дуулсан дуу хоолойтой уран бүтээлдээ оюуны өмчийн эрх авч, продюсерээр дамжуулан тодорхой хугацаанд түрээсэлдэг, худалддаг нэг төрлийн бизнес байдаг. “All or nothing” шоуныхаа ялагчид Snoop Dogg-той хамтран дуулж, клип хийлгэх эрхийг бид худалдаад авчихсан. Анхны санал хамтлагийн маань нэр дээр надад ирж байсан л даа. АНУ-д хөгжмийн продюсингийн чиглэлээр амжилттай явж байгаа нэг залуу танай хамтлаг, эсвэл та Snoop Dogg-той дуулж клипээ хийлгэхгүй юмуу гэсэн саналыг тавьсан. Тэр үед телевизийн ажил эхэлчихсэн байсан болохоор энэ боломжийг олон хүнд нээлттэй болгохыг зорьж, хамтарч ажиллахаар болсон. Нэвтрүүлгийн албан ёсны продюссер Чимбаа, Оки, Ocean Grey, MC дөрөв маань хамтарч зохиосон тэмцээний дүрмийн дагуу ялагчийг тодруулж, Snoop Dogg-той клип хийлгэх эрхийг өгөх юм. Энэ контент маань Монголд анх удаа хийгдэж байгаагаараа онцлог.     

TV ZONE: Телевизийн ажил хэдий цаг наргүй ч “3 үг”, “Мөр” зэрэг бие даасан шинэхэн уран бүтээлүүдээ сонсогчдын хүртээл болгоод байна. Хамтлагийн уран бүтээлчид соло уран бүтээлд орсон юм уу?   

Э.Ганболор: 2 жилийн өмнө Сүндэрээ маань давхар биетэй болж, дараа нь Сарнай гээд жил дарааллан хамтлагийн уран бүтээл хойш тавигдах хугацаанд завтай, чөлөөтэй байгаа нь өөр өөрсдийнхөө онцлогийг харуулсан соло уран бүтээл хийгээд, хамтлагаараа жилдээ 1 проект хийгээд явъя гэсэн зарчмын санал яригдсан. Үүнээс үүдэж хамгийн анхдагчаар миний “3 үг” дуу гарсан л даа. Сарнай маань Замбалгаравтай хамтарч “Ромео Жульетта” жүжгийн дуу дуулсан бол Сүндэрээгийн маань дуунууд тун удахгүй гарах гэж байна. Эргээд харахад хүн болгон өөр өөрийн гэсэн онцлогтой байгааг харах их гоё бас өөр мэдрэмж юм билээ.

TV ZONE: 30 гарсан эмэгтэй хүний хувьд карьерийн тал дээр байр сууриа бэхжүүлчихлээ. Нөгөө талаар гэр бүл төлөвлөлтийн асуудал орхигдлоо гэсэн шахалт ойр дотныхноос нь их ирж байгаа болов уу? Санаа тавиад байгаа юм шиг хэрнээ дарамттай ч юм шиг сэтгэл хуваагдлын үе гэж тодорхойлох нь бий. 

Э.Ганболор: Хаа явсан газар хамгийн чухал сэдэв энэ болоод байгаа. Монголчууд бидний онцлог гэх үү дээ. Манайхан гэр бүлсэг, европчуудыг бодвол бас ч гэж эрт гэр бүлийн амьдрал зохиодог. Миний хувьд нэг их санаа зовдоггүй ээ. Ер нь чихнийхээ хажуугаар өнгөрөөдөг юм. Гэхдээ таны хэлснээр дуугаа дуулаад, ажлаа хийгээд яваад байна, амьдралын хамгийн чухал асуудал болсон гэр бүлийн амьдралаа хэзээд нь зохиох билээ гэж сэтгэл хуваагдах үе гарна л даа. Бидний хувьд 21 настайдаа АНУ-д очиж, олон жил болоод ирсэн. Магадгүй хэсэг хугацаанд европт амьдрахдаа хүмүүсийг хараад эргэн тойронд байгаа байдал, эмэгтэй хүмүүсийн биеэ даасан чадвар, хэзээ яаж төлөвлөж гэр бүлтэй болж байна гэдгийг харж байсан болохоор тайван яваад байх шиг байгаа юм. Одоо бол эргэн тойрныхон маань, хамгийн наад зах нь хамтлагийнхан маань гэр бүлтэй, эхнээсээ 2 хүүхэдтэй болоод ирэхээр хүн болгон чи л хоцорчихлоо л гээд байгаа. Нөгөө талаар энэ бол миний хувийн орон зай. Би хувийн орон зайдаа ямар сонголт хийгээд, яаж амьдрах нь миний л сонголт. Би бусдад хэзээ ч чи хүнтэй суугаачээ, хүүхэдтэй болооч ээ гэж хэлж чадахгүй. Би санаа тавилаа гээд нэмэр болохгүй, би нөхөр олоод өгчихгүй шүү дээ. Түүнтэй адил.  

TV ZONE: Ганболор нийтэч, зөөлөн хүн шиг ажиглагддаг. Та зөөлөн эсвэл хатуу, ширүүн гээд яг ямар захирал вэ?

Э.Ганболор: Би ер нь харагддаг шигээ нийтэч, зөөлөн хүн л дээ. Хатуурхаад байж чаддаггүй. Уурласан ч байсан өргөн хүрээгээр мэдрэгддэггүй. Уур дорхноо гарчихна. Хүн намайг уурлуулж байхад ганц, хоёр хоногийн дараа уур нь гарчихсан явж байдаг. Манай ажлынхан намайг зөөлөн гэдгийг мэднэ гэхдээ зөөлчилдөггүй. Ажлынхаа дүрмийг зөв тогтоочихвол гайгүй байх л гэж боддог. Дарга гээд заавал ааштай, ууртай байх шаардлагагүй. Ажил гэж нервитээд байвал эцсийн эцэст үглээ л хүн болж хувирна шүү дээ /инээв/. Миний хүнтэй харьцах өөрийн арга барил гэж бий. Миний хувьд анх удаа олон хүнтэй харьцаж, удирдаж байгаа болохоор суралцаад л явж байна. Маш олон гэнэтийн бэрхшээлүүд гарч ирнэ. Энэ хүнээс тийм араншин гарна гэж бодоогүй, санаандгүй байтал өөр хандлага гаргах, энэ л ёстой болно доо чадна даа гэж байсан зүйл санасан хэмжээнд хүрэхгүй байх гэдэг ч юмуу маш олон зүйлд суралцаад л явж байна.

TV ZONE: Ярилцахад таатай байлаа. Телевизийн ажил, уран бүтээлд нь өндөр амжилт хүсье!

Э.Ганболор: Баярлалаа, Монголд танай сэтгүүл шиг урт удаан хугацаанд тогтмол гарч байгаа сэтгүүл ховорхон. TV ZONE сэтгүүлийн үнэнч уншигчид сэтгүүлээрээ дамжуулж олны танил хүмүүс, ялангуяа урлагийнхантай харьцаж, маш их мэдээлэл авдаг байх гэж боддог. Уншигчидтайгаа уулзах боломж өгсөн танай хамт олонд их баярлалаа. Та бүхэнд ажлын амжилт хүсье! 

Ярилцсан: Сэтгүүлч М.Хонгорзул

Гэрэл зурагчин: В.Цэнд-Аюуш

Эх сурвалж: UBS