2012 оны УИХ-ын сонгуулиар МАН-аас нэр дэвшсэн “Хас” банкны Ч.Ганхуяг “Нэг ширхэг атар талх 300 төгрөгийн үнэтэй” хэмээн мэдэмхийрч сонгуульд годройтох нүхээ өөрөө ухаж байлаа. Үүнээс хойш “Хас”-ын Ч.Ганхуяг гэхээсээ илүү “Талх” Хуягаа гэж олонд дуудагдах болсон.

Тэгвэл 2016 оны сонгуулийн өмнөхөн сонгогчдоо учиргүй хайрлах болсон гишүүн Д.Тэрбишдагва “Монголчууд минь цаана чинь хүмүүс хонины бүтэн цувдайг аваад идчихэж чадахгүй хэсэг хэсгээр нь авч голоо зогоож байна. Түүнийг нь набор гэдэг юм байна шүү. Мэдэж аваарай!” гээд том онигоонд орж явсан юмдаг.

“Набор” гэдэг нь аль ерээд оны эхэн үе, хүнс барааны хомсдолтой он жилүүдэд хүнсний захын ченжүүдийн зохиосон хэллэг. Ийм хэллэг амьдралд бий болоод бараг 20 жилийн нүүр үзэж байхад Д.Тэрбишдагва хаагуур нь өнгөрч байсан юм бол. Тиймээс өдгөө түүнийг “Набор” Тэрбишдагва хэмээн шоолох болсон түүхтэй.

“Урвагч манайд хэрэггүй, нэг урвасан хүн насаараа урваж шарваж дуусдаг юм”

Д.Тэрбишдагва өнгөрсөн сонгуулиар 26 дугаар тойрог буюу Сонгинохайрхан дүүрэгт МАХН-аас нэр дэвшиж төрийн түшээ болсныг уншигчид юу эс андахав. Гэхдээ мань эр 2012 оны УИХ-ын сонгуулийн өмнөхөн гэнэт шийдвэрээ өөрчлөн МАН-аасаа гарч, МАХН-д элсэж байсан юм. Тэгвэл энэ уламжлал бас л дөрвөн жилийн дараа давтагдаж “Набор” гишүүн маань МАХН-аасаа гарч МАН-ыгаа бараадахаар болсон нь төрхөмдөө буцсан гологдол бэр гэлтэй байгаа.

Сонгуулийн өмнө ширэн нүүр гарган хаяад одсон намынхаа хаалгыг татсан Д.Тэрбишдагвыг хуучин андууд нь “Голсон юм голд ордог нь үнэн байгаа биз” гэцгээн даапаалахад зарчимч, шударга хэсэг нь “Урвагч манайд хэрэггүй, нэг урвасан хүн насаараа урваж шарваж дуусдаг юм” хэмээн эгдүүцсэн байна. Голсон намаа бараадаж “нутаг” буцах ч түүний хувьд дүүрсэн хэрэг. Харин Сонгинохайрхан дүүргийн МАН, МАХН-ны мянга мянган гишүүд “Набор” Д.Тэрбишдагвыг хэрэхэн угтахыг нь харж суух л үлдлээ.