Уулын баяжуулах Эрдэнэт үйлдвэрийг тойрсон асуудал, тэр дундаа Монгол улсын саалийн үнээ гэгдэж байсан энэ үйлдвэрийн дарга хэн болох вэ гэдэг таамгийг амтай болгон нь дэвшүүлж байгаа ч яг таг нэр тодроогүй байна. Ер нь “Эрдэнэт”-ийн захирлуудын халаа сэлгээ, шинэ томилгоо улс төрийн хүрээнд нэлээд бужигнаан үүсгээд байгаа юм.

Хэдхэн хоногийн өмнө алдарт "Алтжин"-гийн Г.Алтанг Эрдэнэт үйлдвэрийн даргаар томилуулахаар УИХ-ын гишүүн Ц.Нямдорж зүтгүүлж байгаа гэх мэдээлэл гарсан ч МАН-ын "хатуу самар" өөрийг нь мэрээд байгаа асуудлын хариуг тэр дор нь барьсан. Ингэснээр алдарт Г.Алтан хатагтайн нэр "Эрдэнэт үйлдвэр"-ийн захирлын марафоноос хасагдсан юм. 

Харин одоогоор тус үйлдвэрийн даргын зөөлөн сэнтийд тухлах хамгийн магадлал өндөртэй хүнээр "Эрдэнэт үйлдвэр"-ийн захирал асан Ч.Ганзориг тодроод байгаа юм.

Харин одоогоор тус үйлдвэрийн даргын зөөлөн сэнтийд тухлах хамгийн магадлал өндөртэй хүнээр "Эрдэнэт үйлдвэр"-ийн захирал асан Ч.Ганзориг тодроод байгаа юм. Гэвч Ч.Ганзоригийг хэн зүтгүүлж байгаа вэ, Ч.Ганзориг хэний хүн бэ? гэх асуултын хариуг нэхэхгүй байгаа нь сонин. Бас албан тушаалын төлөө амаа урахаас наагуур болж өөрийгөө магтан дөвийлгөдөг болсон цаг үед тэрбээр таг чиг байгаа нь олны хардлагыг төрүүлж байна. Өөрөөр хэлбэл сайн муу мэдээллийн алинд ч хариу өгөхгүй байгаа нь ажин түжин хүний зан уу, аль эсвэл ардаа том мотортой юу гэсэн хардлага.

Тэрбээр "Эрдэнэт үйлдвэр"-ийн захирлаар ажиллаж байхдаа хөрөнгө чинээтэй, баян цатгалангаараа цоллуулж, бас шалгагдаж байв. Ёстой л "Од" юм бол зовлонг нь дааж сур гэгчээр том үйлдвэрийн захирлын алба хашиж ажлаа хийснийхээ төлөө бишгүй л хэлүүлж, шалгуулж, хаалгаж боолгуулж, доромжлуулсан гээд туулах л ёстой замыг туучсан нэгэн.

Эрдэнэт үйлдвэрийн захирал асан Ч.Ганзориг гэж хэн бэ?

Сонирхол гэж сонин юм шүү. Ч.Ганзориг гуай малигар шар төрхөндөө инээд тодруулсаар хэдэн үрээгээ ярих дуртай гэж байгаа. Хар залуугаасаа төрийн ажилд дарагдаж төрийн хар хүн гэгдэж яваа ч монгол ёс заншил, молор эрдэнэ болсон морины талаар ямар ч хүнтэй ярихаас булзахгүй нэгэн гэдэг. Арын сайхан хангайнхаа довны хэдэн залуустайгаа уяа нийлүүлж адуун хийморио бадрааж байсан бол тэр Тод манлай уяач цолтой.

Гүүгл хайлтанд Ч.Ганзориг гэж бичээд хайвал түүнтэй холбоотой 10 мэдээллийн 9 нь сөрөг гарч ирнэ. Гэхдээ Чимэддоржийнх гэж ямар үүдтэй айл Ганзориг гэж ямар хүн бэ? Ямар эцэг, сайн нөхөр үү гэдгийг Архангайн Их тамирын нохой ч мэддэг гэх юм билээ.

Нутгийнхан нь түүнийг "Зөөлөн шар хүү", "Сайн уяач", "Төрийн хүн" гээд "эрхлүүлчихдэг" гэсэн шүү. Аавын бийд хүнтэй танилц, агтны бийд газар үз гэгчээр сайн эцгийн сургаал үлгэрлэлээр өдий зэрэгт хүрсэн гэх.  Аав Чимэддорж нь чөлөө зав гарвал л адуу мал гэдэг байсан учраас аавтайгаа зэрэгцэн нутгийн хурдаа шинжиж, хурдан хүлэгээ сойж "Тэмүүлэнгийн минь Дөлгөөн хар хоёр удаа түрүү авлаа" гээд л хэнбугай байсан ч хууч хөөрчихдөг яриасаг аж.

Эрдэнэт үйлдвэрийг хэрхэн толгойлж ажилласныг түүний талаарх мэдээлэл, дайралтуудаас харж болох юм. Шахааны бизнес эрхлээгүй, хэн нэгний хөл гар байгаагүйдээ олон хоног баривчлагдаж шалгагдсан гэх юм билээ. Тэр ажлаа хийж, төрийн хар хүний үүргийг гүйцэтгэж байхдаа элдэвлүүлж байсан ч хэр баргийн үгэнд хариу өгдөггүй нь хачирхалтай. Ойр тойрныхон нь тэвчээртэй гэлцдэг.

Дашрамд хэлэхэд хүү Г.Тэмүүлэн нь 2016 оны УИХ-ын сонгуулиар Архангайн ард түмний итгэлийг хүлээсэн нь нутгийн зон олон Чимэддоржийн Ганзоригийнх гэдэг айлыг хэрхэн үнэлдэг нь харагдах байх.

Ч.Санги