Цахим ертөнцөд сайнтай, муутай өчнөөн л юм өрнөдөг. Ажилтай болж байна, арга туршлагаасаа хуваалцаж байна. Хол ойрын төрлүүдийг ойртуулж, хот хөдөөгийн ялгааг багасгаж байна. Гэвч үүний хажуугаар  хурдан бөгөөд хялбар аргаар мөнгөтэй болохыг уриалсан сүлжээний бизнесчид, хөөрхөн царайгаараа бусдыг татах гэсэн охид, хөвгүүд, хөлсний рекламчдын хүслийг гүйцээдэг талбар бас болжээ. Ялангуяа цахим ертөнцөд “Бурзай, бурзай, Итгэмээргүй юм би үүнийг шэйрлээд мөнгөтэй болчихлоо, Та бас шэйр хийгээрэй, Та харангуутаа шэйрлэвэл мөнгөтэй болно” гэх постууд газар авсаар. Бараг л хүн бүр иймэрхүү зүйлд итгэж, шэйрлэдэг болсон гэхэд хилсдэхгүй. Арга ч үгүй биз. Эдийн засгийн хямрал газар авч, иргэдийн амьдрал туйлдсан учраас иймэрхүү зүйлд итгэж, азанд найддаг болсон цаг. Гэтэл сүүлийн үед энэ явдал улам даамжирч ганцхан зураг түгээгээд л гайгүй сайхан амьдралтай болно, таалагдсан зураг дээрээ дараад л тансаг амьдрал хүрнэ гэж байх юм.

Зүгээр сайхан сууж байгаад л зүлгэн дээр гэрээ бариад амьдарчихдаг бол сайхан л юм. Гэвч амьдрал гэдэг санаснаар болдоггүй. Тийм ч амар зүйл гэж хаа байхав. Харин үүний цаана цахим хуудасныхаа лайк, хандалтыг өсгөх гэсэн хэсэг хүмүүсийг явуулга байдгийн уншигчид тэр бүр мэддэггүй бололтой. Хэрэв та анзаарсан бол зарын сайтуудаар тэдэн мянган дагагчтай хаягууд зарна гэсэн зар их явж байдаг. Энэ хаягуудын цөөн хэд нь дагагчаа автоматаар нэмэгдүүлдэг бол ихэнх нь дагагчаа иймэрхүү байдлаар нэмэгдүүлж, хэрэгтэй хүн болон байгууллагад зарж мөнгө олдог. Өөрөөр хэлбэл таны хүслээр мөнгөждөг гэсэн үг.

Өнгөрсөн хэдэн өдрүүдэд цахим ертөнц хэдэн зуун саяын үнэтэй машинаар давалгааллаа. Шалтгаан нь ганц лайк дараад л ганган сайхан хөлөгтэй болох юм гэнэ. 24 цаг хүрэхгүй хугацаанд 25 мянган лайк, 26 мянган шэйр авсан эдгээр постууд монголын цахим  хэрэглэгчид үнэхээр гэнэн итгэмгийг харуулав уу эсвэл бэлэнчлэх сэтгэлгээтэй, оюун санааны хувьд хөөрөлттэйг илтгэв үү. Хүн бүр машинтай болно, азтай гэр бүл, G Class гэх мэтээр түгээцгээж байв.

Хамгийн харамсалтай нь энэ постыг шэйрлэж байгаа хүмүүсийн дийлэнх нь Монголын маань ирээдүй болсон залуучууд байна. Өнөөдөр ид хийж бүтээх насандаа яваа залуу хүн “Аз аз” хэмээн биччихээд “Үүнийг шэйр хийвэл үнэхээр аз, мөнгө дууддаг юм байна” хэмээцгээж байгаа нь ямар залхуу, сэтгэлгээний хувьд ямар их доройтолд орсныг харуулах мэт. Хоёр, гурван зуун сая төгрөгөөр үнэлэгддэг машиныг хоёр, гурав лайк дарж, шэйр хийсэн хүнд өгөхгүй  нь л ойлгомжтой шүү дээ. Үүнийг одоог хүртэл ойлгохгүй энэ мэдээллийг түгээсээр байгаа нь энгийнээр хэлбэл эмгэнэл мэт.

Сүлжээ ёстой худлаа шүү гэсэн хэрнээ л хэн нэгэн их ашигтай мэт санагдах, амархан  мөнгөтэй болчих санагдахуйц саналыг хэлэхэд л өөрийн мэдэлгүй орчихсон жишээг захаас нь аваад дурдвал олон бий. Гэтэл орос хөргөгч, туухай, будаатай шаазан өндөр үнээр авах тухай гээд элдэв мэдээлэл постыг ч монголчууд харамгүй шэйрлэж, сохроор дагасаар эцэс сүүлд нь хохирогч болсон зуун зуун иргэд цагдаагийн байгууллагад хандсаар байна. Телевиз, сонин хэвлэлүүдээр “Сүлжээний бизнест битгий элс” гээд хамаг чадлаараа ухуулаад ч монголчуудын энэ мунхаглалыг  үл зогсооно.

Монголд бүртгэлтэй гар утас хэрэглэгч 5.5 сая, идэвхтэй хэрэглэгч 3 сая, 3G хэрэглэгч 2.2 сая хэрэглэгч /сим/ бий гэсэн статистик тоо бий. Мөн интернэт хэрэглэгчийн тоо 2.4 сая байгаагаас фэйсбүүк хэрэглэгч 1 сая гаруй хүн бий. Улс орны боловсролын түвшинг бичиг үсэг хэр тайлагдсанаар нь хэмждэг. Эдгээр хүмүүс бүгд бичиг үсэг тайлагдсан, лайк шэйрээ ялгахтайгаа. Гэвч энгийн зүйл дээр хий хоосноор сэтгэж, элдвийн юманд итгэж байгаагаас харахад боловсролын түвшинг тогтоодог жишиг үзүүлэлт  “болоогүй юм байна” гэж бодогдохоор...

24tsag.mn