Байгаль орчин, хүнс, хөдөө аж ахуйн байнгын хорооны энэ оны хаврын ажлыг өнөөдөр Төрийн ордонд танилцууллаа. Хуралд Байгаль орчны Байнгын хорооны дарга Л.Элдэв-Очир, Байнгын хорооны гишүүн Б.Саранчимэг, Д.Цогтбаатар нар оролцлоо.
Байнгын хороо энэ хугацаанд нийт 12 удаа хуралдаж, давхардсан тоогоор 24 хуулийн төсөл, УИХ-ын тогтоолын 3 төсөл, сайдын мэдээлэл 7 сонсож, 4 хууль, УИХ-ын 1 тогтоол батлуулсан байна. Түүнчлэн Монгол Улсын иргэнд газар өмчлүүлэх хуулийн төслийг УИХ-ын чуулганаар хэлэлцэн батлуулжээ. Ингэснээр иргэд нэг удаа газар үнэгүй өмчлөх хуулийн заалтууд хүчин төгөлдөр болж, арван жил хүртэлх хугацаагаар сунгагдсан юм.
Мөн Ус цаг уур, орчны хяналт шинжилгээний тухай хуульд өөрчлөлт оруулах тухай хуулийн төсөл болон Баяжуулсан хүнсний тухай хуулийн төслийг хэлэлцэн баталжээ. Баяжуулсан хүнсний тухай хууль нь батлагдсанаар хүн амын эрүүл мэндийг хамгаалах, аминдэм, эрдэс бодисын дутлаас урьдчилан сэргийлэх зорилгоор зарим төрлийн хүнсийг албан журмаар баяжуулж, амьжиргааны баталгаажих доод түвшингээс доогжуур орлоготой иргэд шим тэжээллэг хүнс боломж бүрдэх, бага зардлаар хүн амын аминдэмийн хэрэгцээг хангах, улирлын чанартай шим тэжээлийн дутагдлаас сэргийлэх боломж нээгдэнэ гэж тэд үзэж байна.
Ус бохирдуулсны төлбөрийн тухай хуульд өөрчлөлт оруулах тухай төсөл болон бусад холбогдох хуульд нэмэлт өөрчлөлт оруулах тухай хуулийн төслийг чуулганаар хэлэлцүүлэх бэлтгэл хангах, санал, дүгнэлтийн төсөл боловсруулах үүрэг бүхий ажлын хэсэг байгуулагджээ.
Ус бохирдуулсны төлбөрийн тухай хууль нь анх 2012 онд батлагдаж байсан боловч хэрэгжиж чадалгүй явсаар энэ оныг хүргэсэн байна. Энэ талаар Байгаль орчны байнгын хорооны гишүүн Б.Саранчимэг ярихдаа “уг нь 2012 онд хууль нь батлагдаад Засгийн газраас журам батлагдсанаар хэрэгжиж эхлэх байсан ч журам нь гараагүй учраас саатахад хүрсэн” гэлээ. Тухайн хууль анх батлагдсанаас хойш ямар ч иргэн, аж ахуй нэгж ус бохирдуулсны төлбөр төлөөгүй аж. Тиймээс уг хууль хэрэгжиж эхэлснээр тухайн ус бохирдуулж байгаа албан байгууллагууд өөрсдөө цэвэрлэх байгууламжтай болох, цаашлаад бодитоор хэрэгжүүлээд явбал УИХ-аас бодлогоор дэмжиж өгөх тухай хэлэлцэж байгаа аж.
Б.Цэрэнлхам
