“Хүрэлсүхдэх”, “баярсайхандах” гэх зэрэг этгээд үгийг Монголын хэлний үгийн санд оруулж ирсэн УИХ-ын хоёр гишүүний зодооны тухай яриа өндөрлөөгүй, цааш үргэлжлэх шинжтэй. У.Хүрэлсүх, Г.Баярсайхан нарын аль аль нь өөрийн буруугүйг баталж “гоё” харагдах гэж зүтгэж байна. У.Хүрэлсүх “жинхэнэ эр хүн” гэдэг тактик хэрэглэж байгаа бол Г.Баярсайхан гишүүн “өрөвдүүлэх” гэсэн эсрэг арга барилаар “ажиллаж” байх шиг. У.Хүрэлсүх: "Цэргийн сургууль төгссөн, эх орныхоо төлөө тангараг өргөсөн хүн жирийн нэг бацаанд заамдуулаад, боолгож унаад байх нь хаашаа юм. Өөрийнх нь хийсэн боолтны эсрэг хариу арга хэмжээ л авсан. Тэрэн дээр нэг их гоншигноод байх юу байх вэ" гэв. Тэгвэл Г.Баярсайхан гишүүн: "Би эрийн хугархай. Тэр үгэнд нь эмзэглэсэн. Гэхдээ би сэтгэлээ барьсан. Гараад уулзаж учраа олох гэж байна гэж бодоод муу зүйл бодолгүй гарсан. Ариухан залууг зүгээр байхад нь өдчихсөн бололтой юм. Би ширээнээсээ босоогүй. Би гэр бүлтэй, үр хүүхэдтэй хүн. Амь насанд заналхийлж, улстөрч хүн улстөрчийнхөө амь насанд заналхийлнэ гэдэг ноцтой" гэсэн юм.

   Ямартаа ч тэдний дуулиан УИХ-ын гишүүдийг улам л “эмзэг” болгов. МАН, АН-ын зарим гишүүд намын гишүүнээ өмөөрөх үү, эсвэл дунджийг бариад дуугүй сууж байх уу гэж эргэлзсээр байгаа аж. Сэтгүүлчийн асуултанд гэнэдээд хариулчих вий гэж зарим нь ч биеэ хянаж буй бололтой. Харин У.Хүрэлсүх, Г.Баярсайхан нарын “сахилгагүй” үйлдлийн талаар байр сууриа илэрхийлсэн зарим нэг “зоригтой” эрхмүүд байна аа, байна. МАН-ын гишүүдээс Хууль зүйн сайд асан Ц.Нямдорж У.Хүрэлсүхийг сүрхий сайн өмөөрчээ. Харин АН-ын гишүүдээс С.Эрдэнэ намын нөхөр Г.Баярсайханаа өмгөөлөв. Г.Уянга гишүүн ганцаараа эмэгтэй хүний үүднээс байр сууриа илэрхийлсэн юм. Эдгээр гишүүд дотор ам нээсэн ч араа бодож “бөөрөнхий” хариулт өгсөн нь ч байна.

Ц.Нямдорж: Г.Баярсайхан танхай балмад юм ярьж, муухай доромжилсон болохоор л У.Хүрэлсүхэд цохиулсан юм билээ. Г.Баярсайханыг бас шоронд суух ёстой гэж өөр хүн хэлж болно шүү дээ. Ер нь хүнийг гянданд суулгадаг хэн юм бэ? Манай УИХ-ын танхим дотор ийм ёс бус үйлдэл гарч байгаагүй Энэ бол анхны тохиолдол харамсалтай байна.

Ё.Отгонбаяр: Хүмүүс хоорондын асуудлаа өөрсдөө шийдэх байлгүй дээ. Тухайн үед чуулганы хуралдаанд сууж байсан учир байдлыг нүдээр хараагүй.

Ө.Энхтүвшин: Би энэ тухай мэдээгүй, хараагүй. Гишүүдийн ёс зүйн хэм хэмжээг зохицуулсан хууль, дүрэм бий.

Су.Батболд: Парламентийн гишүүдийн аль зодолдохыг тэр гэдэг юм. Манайхаас бусад улсын парламентийг гишүүн байнга зодолдож байдаг биз дээ.

С.Эрдэнэ: У.Хүрэлсүхийн хувьд ахны удаагийнх биш. Э.Мөнх-Очир гишүүний толгой тархийг хагаллаа, зодлоо, нүдлээ гээд бөөн юм болсон. Ер нь зодоон нүдээнд их дуртай юм шиг байна. Тэвчээр барагдлаа гээд барьж аваад зодоод байж болох уу?

Х.Тэмүүжин: Их аварга байна уу,  Их хурлын гишүүн  байна уу. Хүн зодсон л бол тэдэнтэй хууль ярина.

Х.Баттулга: Хэн юугаа гайхуулаад байгаа юм бэ? Камерийн өмнө тодроод л...

Г.Уянга: Яаааг элдэв санаагүй юу бодогдсоноо чин үнэнээр нь хэлэх үү? Процессыг эхнээс нь аваад дуустал харсан хүний хувьд? Хүрэлсүх дажгүй ээ. “Хүрэлсүхдэх” бол байх л асуудал. Харин “Баярсайхандах” л жаахан эвгүй байж магадгүй шүү.

Д.Батцогт: “Улс  төр төвөгтэй ажил. Гэхдээ УИХ-ын гишүүн гэхээрээ юу ч хийж болдог гэсэн үг биш. Биеэ авч яваа байдал, ааш аягаа хянаж байх ёстой.