"Зэрэг нэмэхийн өмнө" кинонд гардаг шиг үйл явдал ойрмогноос Монголын улс төрд өрнөх бололтой. Энэ нь Монгол Улсаас Болгар Улсад суух Онц бөгөөд Бүрэн эрхэт Элчин сайдаар Ц.Цэнгэлийг томилох саналыг Засгийн газрын хуралдаанаас дэмжсэнтэй холбоотой. Уг саналыг Ерөнхийлөгч Х.Баттулгад хүргүүлэх бөгөөд хэрвээ Засгийн газрын саналыг зөвшөөрч, зарлиг гаргавал Ц.Цэнгэл нь Болгарт Элчин сайдаар суух юм.
Гэвч яг ийм эгзэгтэй цаг үед түүний англи хэлний мэдлэгийг харуулсан бичлэг цахим орчинд тархаж, олны бухимдлыг төрүүлээд байна.
Тэгвэл Элчин сайдын суудал горилогч Ц.Цэнгэл гэж хэн бэ.
Тэрбээр Уралын Политехникийн дээд сургуулийг эрчим хүчний инженер мэргэжлээр дүүргэн ажил амьдралынхаа гарааг “ТЭЦ-3”-аас эхэлсэн байдаг. УИХ-ын гишүүн асан Ц.Цэнгэл нь Дэд бүтцийн яамны Төрийн нарийн бичгийн дарга, Зам тээвэр, аялал жуулчлалын сайд, Байгаль орчин, ногоон хөгжил, аялал жуулчлалын яамны Төрийн нарийн бичгийн даргаар ажиллаж байсан туршлагатай. Төрийн нарийн бичгийн даргын үүрэгт ажлаа оны өмнө өгсний дараа Элчин сайдын суудлыг ийнхүү горилж яваа. Гэвч дээрх бичлэг задарсанаар түүний эл мөрөөдөл биелэх эсэх нь эргэлзээтэй болж байх шиг байна.
Учир нь Дипломат албаны тухай хуулийн 15.2-т Дипломат албан тушаалд томилогдох иргэн нь олон улсын эрх зүй, эдийн засаг, улс төрийн харилцааны онолын зохих бэлтгэлтэй, дадлага туршлагатай, дээд боловсролтой, 2 буюу түүнээс дээш гадаад хэлийг шаардлагын түвшинд эзэмшсэн байх бөгөөд нэг нь түгээмэл гадаад хэл байна гэж заасан байдаг.
Дээрх бичлэг яг хэзээнийх, ямар хурал нь тодорхойгүй ч баттай ганц зүйл нь Ц.Цэнгэл нь хуульд заасан өнөөх түгээмэл гадаад хэл таг бололтой. Хэрвээ уг хурлаас хойш мань хүн гадаад хэлний мэдлэгээ дээшлүүлж, төгсрүүлчихээгүй л бол шүү дээ.
Гэтэл ийм хүнийг Засгийн газрын хуралдаанаас дэмжээд дэвшүүлчихдэг нь тун хачирхалтай. Угтаа бол шударга үнэний дуу хоолой, хариуцлагын сэлэмчин хэмээгддэг хүн нь Ерөнхий сайд У.Хүрэлсүх өөрөө. Гэтэл англи хэлэндээ таг ийм хүнийг Элчин сайдаар зүтгүүлсэн нь цаанаа эрх ашгийн сонирхол нуугдаж байгаа юм биш биз гэж хардахаар байна.
Хэрвээ үнэхээр төрийн болон дипломат албат нь мэргэшсэн байх ёстой юм бол зэрэг нэмэхийн өмнө гэдэг шиг эрхэм горилогч Ц.Цэнгэлд Элчин сайдын суудал олдох учиргүй байлтай. Хариуцлагын сэлмээ эргүүлэхдээ гаргууд сайн Ерөнхий сайд маань эрх биш энэ зэргийн юмыг гадарлахтайгаа гэж найдая даа.
Г.Маргад
Сэтгэгдэл (57)