Ерөнхий боловсролын сургуулийн нэгдүгээр ангид зургаан настнуудыг элсүүлдэг болоод 14 жил болж байна. Харин  зургаан настнууд сургуульд ороход бие бялдар болоод сэтгэл зүйн хувьд бэлэн байдаг уу. Эцэг, эхчүүдийн дийлэнх нь үгүй гэж хариулах биз ээ. Учир нь, тэдний тоглож, наадах балчир насанд нь хичээлээр  дарж, ялангуяа бага ангийн багш нар гэрийн даалгавраар “бөмбөгдөж” байгаад эцэг, эхчүүд шүүмжлэлтэй ханддаг. Энэ нь эргээд хүүхдийг залхаах, хичээл номдоо дургүй болох эхлэлийг тавьдаг байна.

Жилээс жилд ярьж, шүүмжлэл дагуулдаг энэ асуудалд "Oak education” гэр бүлийн боловсролын төвийнхөн судалгаа хийжээ.

Судалгаагаар ялангуяа нэгдүгээр ангийн хүүхдүүдэд Олон улсын стандартаас 13 дахин их хугацаагаа зарцуулах гэрийн даалгавар өгч байгааг тогтоосон байна.

 Олон улсын стандартаар:

-Нэгдүгээр ангид 10 минут

-Хоёрдугаар ангид 20 минут

-Гуравдугаар ангид 30 минутын хугацаанд гүйцэтгэх гэрийн даалгаврыг өгдөг байна. Харин манай улсад эсрэгээрээ зургаан настай нэгдүгээр ангийнхан гэрийн даалгавар хийхдээ өдөрт дундажаар 134 минут буюу хоёр цаг 14 минут зарцуулдаг байна. Үүнээс харахад манай боловсролын тогтолцоо хүүхдээ залхаах, эцэг, эхийг стрессдүүлэх, багш нарыг ачааллаар дарах ийм л зарчмаар явж иржээ.

БСШУС-ын сайд асан Ц.Цогзолмаа зургаан настнуудыг нэгдүгээр ангид элсүүлэхэд арай л балчир байна. Тиймээс долоон настайд нь элсүүлж байх хуулийн төсөл санаачлан, үүний тулд холбогдох албаныхны байр суурь, эцэг, эхчүүдийн санаа бодлыг сонсч, далайцтай ажлыг хийсэн. Даанч тэрбээр дахин сонгогдож чадаагүй учраас энэхүү төсөл гацсан гэж хэлж болно.

У.Тэргэл