Цэргийн албаны нэр хүнд нэг хэсэгтээ л сэвтэж, эцэг, эхчүүд хүүгээ явуулахдаа хойш суудаг болсон. Он жавуудын дэглэлт, дарга нарынх нь дарамт шахалтаас гадна хоол муугаас тураалтай цэрэг олон болсон. Харин цэргийн албыг нэг жил болгосноор, дээр нь төрийн албанд ороход заавал цэргийн жинхэнэ алба хаасан байх ёстой гэсэн шалгуурыг тавьсан нь хөшүүрэг болж, олон залуус цэргийн алба дүүргэхээс аргагүйд хүрсэн гэлтэй. Үүнийг дагаад цэргийн жинхэнэ албаны нэр хүнд өсч, дарга, цэргийн дэглэлт багасч, харин ч сурч боловсрох, мэргэжил эзэмшихэд таатай болсон.

Төрийн албанд орохын тулд цэргийн жинхэнэ албыг заавал хаасан байх ёстой. Энэхүү хуулийн заалтыг сийрүүлбэл, Төрийн албаны тухай хуулийн 16 дугаар зүйлийн 16.2.4-т зааснаар цэргийн жинхэнэ алба хаах үүрэг хүлээсэн иргэн энэ үүргээ биелүүлээгүй бол төрийн жинхэнэ албан тушаалд авч ажиллуулахыг хориглоно.

Гэхдээ энэ заалтыг 2008 оны тавдугаар сарын 06-ны өдрөөс өмнө 18 нас хүрсэн, түүнчлэн эмнэлгийн магадлагаагаар эрүүл мэндээр тэнцээгүй, хуульд заасан бусад үндэслэлээр цэргийн жинхэнэ албанаас түр буюу бүрмөсөн чөлөөлсөн иргэнд хамаарахгүй юм. Иймээс 1990 оны тавдугаар сарын 06-ны өдөр болон түүнээс хойш төрсөн иргэн хуульд заасан цэргийн жинхэнэ алба хаах үүргээ биелүүлээгүй бол төрийн жинхэнэ албаны мэргэшлийн шалгалтад оруулахгүй болно хэмээн заажээ.

Төрийн алба руу залуус юунд хошуурна вэ. Мэргэжилдээ ахиж дэвшихийн тулд нэр хүндээ өсгөх шаардлагатай. Мөн албан тушаал ахих ялангуяа улс төрд хөл тавих гишгүүр нь болж өгдөг учраас тэр юм.  Сонирхолтой нь, цэргийн алба хаах болсон шалтгааныг цэргээс халагдсан залуусаас лавлахад тэдний 70 гаруй хувь нь төрийн албан хаагч болохын тулд гэж хариулжээ. Эмзэглэмээр ч үнэн хариулт юм.  

У.Тэргэл