АНУ-ын Төрийн нарин бичгийн даргын орлогч Венди Шерман Орос-Украины нөхцөл байдалтай холбоотойгоор Украин улсад үүсэж буй хоол хүнсний хомстол цаашид цар хүрээгээ тэлж дэлхий нийтийг нөмрөх тухай өмнөх мягмар гарагт зохиогдсон НҮБ-ын хурлын үеэр ам нээжээ.

Венди Шерман, “ОХУ Хар тэнгист хүнс зөөвөрлөж байсан дор хаяж гурван хөлөг онгоцыг бөмбөгдсөн. Оросын тэнгисийн цэргүүд Украины усан боомтууд руу нэвтрэх болон тэндээс гарах замуудыг хаасаар байна. Ингэснээр тэд Украин улсын эдийн засагт хүчтэй нөлөө үзүүлдэг үр тарианы экспортыг хааж байгаа бөгөөд 94 гаруй хүнс тээвэрлэсэн хөлөг онгоцыг Газар дундын тэнгис рүү нэвтрүүлэхгүй хорьж байгаа юм. Украины үр тариа дэлхийн бусад орнуудад хүрэхгүй байна гэдэг бол бодит асуудал.

Хэрэв Владимир Путин энэхүү дайныг цаашид үргэлжлүүлсээр байвал дэлхий нийт хүнсний хомстолд орох нь цаг хугацааны л асуудал. Владимир Путин дайныг эхлүүлсэн бол одоо бүх хүн төрөлхтнийг хүнсний хомстолд оруулах гэж байна.

Энэхүү аюулаас урьдчилан сэргийлж чадах ганц хүн бол Владимир Путин өөрөө. Түүний гаргасан дайн эхлүүлэх шийдвэрээс болж гэмгүй хүмүүс амь үрэгдсээр байна” гэж хэлжээ. Мөн өнөөдрийн байдлаар Украин улсын иргэдийн 45 гаруй хувь нь хангалттай идэх хүнсгүй байгаа бөгөөд тус улс нь дэлхийн улаан буудайн 30 хувийг, наран цэцгийн тосны 75 хувийг, үр тарианы 20 хувийг дангаараа хангадаг билээ.

Эх сурвалж: CNN