Украин улсын ерөнхийлөгч Владимир Зеленский өнгөрсөн лхагва гарагийн орой цацсан бичлэгийнхээ үеэр ОХУ-тай хийж буй хэлэлцээ бол зүгээр л хоосон үгс төдий байгаа гэж хэлсэн байна.

Тэрбээр уг бичлэг дээрээ, “Бид ОХУ-тай хэлэлцээ хийсээр байгаа. Гэхдээ энэ нь одоогийн байдлаар зүгээр л хоосон үгс төдий байна. Чернигов болон Киевийн нутаг дэвсгэрээс ОХУ цэргээ татсан үйл явдал нь Украины зэвсэгт хүчний хүч чадлыг харууллаа. Бид өөрсдийн газар нутгаасаа нэг ч метрийг харийн оронд алдахгүй. Орос цэргүүд Донбассын бүс нутагт шинэ дайралт хийхээр төлөвлөж байгаа бөгөөд манай арми уг дайралтад бүрэн бэлтгэлтэй байгаа. Мөн манай зэвсэгт хүчнийг шүүмжилж бидэнд хэрхэн байлдахыг гэрийнхээ буйдан дээрээс заадаг хүмүүст хандаж хэлэхэд дайны талбар дээр бидэнд бодитоор хичээл заахыг хүсэж байна. Үүнээс гадна АНУ-ын ерөнхийлөгч Жо Байденд нэмэлт 500 сая ам.долларын тусламж үзүүлсэнд нь талархал илэрхийлье. Бид энэхүү дайнд ялалт байгуулахын тулд АНУ гэх мэт олон анд нөхөд хэрэгтэй. Эрх чөлөөний төлөө байлдаж буй цэргүүд дарангуйлагчдаас үргэлж хүчтэй байх болно” гэж хэлжээ.

Эх сурвалж: CNN