ЦХХХ-ны Н.Учрал, Эрүүл мэндийн сайд С.Энхболд нар цахим шилжилттэй холбоотойгоор уулзалж, санал солилцлоо. Энэ үеэр ЭМ-ийн сайд С.Энхболд мэдээлэл өглөө.
Тэрбээр "Өнөөдрийн уулзалтаар Цахим хөгжил, харилцаа холбооны яамнаас арга зүйн зөвлөгөө, мэргэжлийн тусалцаа хүссэн юм. Н.Учрал сайд эрүүл мэндийн цахимжилтад тулгарч буй саад бэрхшээлийг ойлгож хоёр сайдын хамтарсан тушаал гаргах замаар тулгарч буй асуудлыг шийдэх ажлын хэсгийг байгуулна.
Эрүүл мэндийн салбарт Дэлхийн банкны санхүүжилттэй Эрүүл мэндийн цахимжилт хөтөлбөр хэрэгжиж буй. Энэ төслийг үргэлжлүүлэх, алдааг нь засахад хоёр яам хамтран ажиллана.
Үүний үр дүнд иргэн бүр и-карттай болж аль ч эмнэлэгт очсон таны мэдээллийг эмч цахимаас харж үйлчилгээ үзүүлэх нөхцөл бүрдэх юм.
Цаашид эрүүл мэндийн салбарыг бүрэн цахимжуулна. Тухайлбал, Эрүүл мэндийн салбарыг цахимжуулах ажил олон жилийн өмнөөс эхэлсэн. Гэвч өнөөдөр 37 өөр программ манай салбарт ашиглаж байна. Эдгээр нь хоорондоо мэдээлэл солилцдоггүй. Үүний улмаас иргэд эмнэлэг бүрд карт нээлгэж, эмнэлэг хооронд олон цаас, шинжилгээний бичиг зэргээ аваад явж буй. Үүнийг өөрчлөхийн тулд Эрүүл мэндийн салбарыг цахим шинэчлэлийг эрчимжүүлэх чиглэлд анхаарч ажиллаж байна" гэв.
