УИХ-ын чуулганы нэгдсэн хуралдаан үргэлжилж байна.  Боловсролын салбарт хэрэгжүүлж буй шинэчлэл, үр дүнгийн талаар хэлэлцэж байна. Энэ үеэр гишүүд асуулт авч, хариуллаа. 

УИХ-ын гишүүн С.Ганбаатар: "Бид боловсролын салбараараа 30 жил тоглосон. Аль ч улс боловсролын салбараа гадныхнаар тоглуулж болохгүй. Л.Энх-Амгалан сайдын нэг зүйл нь реформ хийх гэж оролдож байгаа явдал. Нэгдүгээрт, Англи Улс долоон жилийн өмнө хувийн ерөнхий боловсролын сургуулийн тогтолцоог халсан, хоёр жилийн өмнө БНЭУ зогсоосон. Аав нь хэр мөнгөтэйгөөс шалтгаалж боловсрол эзэмшдэг биш хүүхдийн авьяас, хичээл зүтгэлийг дэмждэг тогтолцоо руу орох ёстой. Харин одоо бол аавынх нь дансан дахь мөнгө боловсролын шалгуур болчихсон. Хоёрдугаарт, ирэх онд боловсролын салбарын ажилтнуудын цалин нэмэгдэх үү? одоо наана чинь ажиллах хүнгүй боллоо. ЕБС, цэцэрлэгийн тогооч нарын цалин 528.520 төгрөг. Энэ хүнийг яаж сар ажлуулах вэ, ямар сайн хоол өгөх вэ? Ирэх онд яг хэдэн төгрөгөөр нэмэгдэх вэ? Цалин нэмэх тухай биш, цалингийн алдагдсан хэсгийг Засгийн газар буцааж өгөх үү?"

УИХ-ын гишүүн, Боловсрол, шинжлэх ухааны сайд Л.Энх-Амгалан: "Нийслэлд үйл ажиллагаа явуулж байгаа хувийн хэвшлийн, өндөр төлбөртэй ерөнхий боловсролын сургуулиудыг ад үзэж болохгүй. Тэд боловсролын салбарын тодорхой ачааллыг хуваалцаж, боловсролын чанарт тодорхой хувь нэмэр оруулж, үүрэг хүлээж байгаа хүмүүс. Хэрэв олон улсын хөтөлбөртэй сургуулиуд байгаагүй бол хувийн сургуулиудад суралцаж байгаа 40 мянган хүүхэд хилийн гадна сурах байсан. Бид валютын нөөц, ханшийн чангарал ярьж байна. Гэтэл жил бүр хилийн гадна хүүхдүүдээ сургахад 400 сая ам.доллар зарцуулдаг. Тиймээс нийгэмд үзүүлж байгаа нөлөө, эдийн засагт өгч байгаа нөлөө талаас нь харах ёстой. Өндөр төлбөртэй буюу 10 сая төгрөгөөс дээш төлбөртэй  ерөнхий боловсролын сургуулийн хүүхдийн хувьсах зардлыг өнгөрсөн жилээс эхэлж зогсоосон.

С.Ганбаатар гишүүнээ, Англи Улс хувийн сургуулийн тогтолцоогоо халсан гэж иргэдэд худал мэдээлэл өгөхөө боль. Бүх гишүүдийн өмнө микрофон бий, гэхдээ иргэдэд зөв мэдээлэл өгдөг болъё. Нэг өдрийн пи-ар чухал биш шүү. Тиймээс боловсролын тогтолцоонд тулгамдаж байгаа асуудалд эрүүл саруул мэтгэлцээн хийе. Эндээс хэн хожиж, пи-арынхаа оноог цуглуулах нь надад 300,400 дэх асуудал. Одоо цалин гэж хашхирдгаа боль, бид үр дүнд суурилсан цалингийн тогтолцоонд шилжиж байгаа. Чадварлаг багш, хамт олон өндөр цалин авна. Үзвэл, нийт авч байгаа цалингийн 60 хүртэлх хувьд үр дүнгийн урамшуулал авч байгаа энэ тогтолцоо руу шилжсэн. Төсөв ярихаар цалин нэмэхийн төлөө цээжээ уралдуулдгаа больё" гэв.

Т.Мөнхжаргал